បាងកក៖ តុលាការថៃនឹងបើកសវនាការលើសំណុំរឿងចោទប្រកាន់នយោបាយចំនួនបីនៅសប្តាហ៍ក្រោយលើនាយករដ្ឋមន្រ្តីថៃលោកស្រេថា ថាវីស៊ីន រួមទាំងសំណុំរឿងមួយដែលអាចនាំទៅដល់ការបណ្តេញនាយករដ្ឋមន្ត្រីចេញពីតំណែង។ នេះបើយោងតាមការចុះផ្សាយរបស់កាសែតថៃបាងកកប៉ុស្តិ៍។
នៅក្នុងសេចក្តីថ្លែងការណ៍មួយកាលពីថ្ងៃពុធតុលាការធម្មនុញ្ញថៃបានបញ្ជាក់ថា ខ្លួននឹងបើកសវនាការលើសំណុំរឿងលោកនាយករដ្ឋមន្រ្តីថៃ ស្រេតថាថាវីស៊ីននៅថ្ងៃទី ១៨ ខែមិថុនាខាងមុខនេះ បន្ទាប់ពីតុលាការថៃទទួលបានពាក្យបណ្តឹងរបស់សមាជិកព្រឹទ្ធសភាថៃ៤០រូប ដែលចោទថាលោកស្រេថាបានធ្វើការតែងតាំងមន្រ្តីក្នុងជួលរដ្ឋាភិបាលមួយចំនួនដែលធ្លាប់ជាប់ពាក់ព័ន្ធទៅនឹងការប្រព្រឹត្តិអំពើពុករលួយ៕
