ព្រះសីហនុ៖ លទ្ធផលបឋម នៃការបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាក្រុង និង ក្រុមប្រឹក្សាស្រុកនៅខេត្តព្រះសីហនុ បានបង្ហាញថា គណបក្សប្រជាជនកម្ពុជា បានឈ្នះចំនួនអាសនៈដាច់ គ្រប់ក្រុមប្រឹក្សាខេត្ត ក្រុង ស្រុក ខណ្ឌ របស់ខ្លួនទាំងស្រុង ជាមួយការកើនឡើងសំឡេងគាំទ្រផងដែរ។នេះបើយោងតាមរបាយការណ៍បឋមពីគណបក្សប្រជាជនកម្ពុជា នៅក្នុងខេត្តព្រះសីហនុ។
យោងតាមរបាយការណ៍ បានគូសបញ្ជាក់ថា សម្រាប់ ក្រុមប្រឹក្សាខេត្ត គណបក្សប្រជាជនទទួលបាន ១៧១សំលេង (កើន១០សំលេង) អាសនៈ១៩/១៩ គណបក្សឆន្ទៈខ្មែរទទួលបាន០៦សំលេង អាសនៈ០/១៩។ចំណែកក្រុមប្រឹក្សាក្រុង ស្រុក រកឃើញថា ក្រុងព្រះសីហនុ គណបក្សប្រជាជនទទួលបាន ៤០សំលេង អាសនៈ១៩/១៩ គណបក្សឆន្ទៈខ្មែរទទួលបាន ០២ សំលេង អាសនៈ០/១៩។
ចំណែក ស្រុកព្រៃនប់ គណបក្សប្រជាជនទទួលបាន ៧៩សំលេង អាសនៈ១៩/១៩ គណបក្សកម្លាំងជាតិទទួលបាន០៣សំលេង អាសនៈ០០/១៩ មិនបានការ ០១សំលេង។ ស្រុកស្ទឹងហាវ គណបក្សប្រជាជន ទទួលបាន២២សំលេង អាសនៈ១១/១១។ ស្រុកកំពង់សីលា គណបក្សប្រជាជន ទទួលបាន២០សំលេង អាសនៈ១១/១១។ ក្រុងកោះរ៉ុង គណបក្សប្រជាជនទទួលបាន ១០ សំលេង អាសនៈ១១/១១។
គួរបញ្ជក់ថា ប្រទេសកម្ពុជា នៅថ្ងៃទី២៦ ខែឧសភា ឆ្នាំ២០២៤នេះ រៀបចំការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក និង ក្រុមប្រឹក្សាខណ្ឌ អាណត្តិទី៤ ដោយគណបក្សនយោបាយចំនួន៥ ចូលរួមការបោះឆ្នោតនេះ។
លោក ឌឹម សុវណ្ណរុំ អ្នកនាំពាក្យ គ.ជ.ប បានប្រាប់ ស៊ីស៊ីថាមស៍ គិតមកដល់ម៉ោងនេះ គ្រប់ការិយាល័យបោះឆ្នោតទាំងអស់បានបិទបញ្ចប់ និង បានរាប់សន្លឹកឆ្នោត ខណៈលទ្ធផលបឋម បានប្រកាសផងដែរ។សម្រាប់លោក ដំណើរការបោះឆ្នោតពេលនេះ គឺដំណើរការល្អ គ្មានអំពើហិង្សាកើតឡើងនោះទេ៕
