ភ្នំពេញ៖ រដ្ឋមន្ត្រីការពារជាតិអាម៉េរិក លោក Lloyd Austin នឹងធ្វើដំណើរទៅកាន់តំបន់ឥណ្ឌូប៉ាស៊ីហ្វិកក្នុងខែមិថុនា ដើម្បីចូលរួម "កិច្ចសន្ទនា Shangri-La" ធ្វើឡើងក្នុងប្រទេសសិង្ហបុរី ហើយបន្ទាប់មកលោក នឹងបំពេញទស្សនកិច្ចនៅប្រទេសកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងការបរទេសអាម៉េរិក។
យោងតាមសេចក្តីប្រកាសព័ត៌មាន នាសប្តាស៍ក្រោយនេះ លោក Lloyd Austin នឹងចេញដំណើរទស្សនកិច្ចជាផ្លូវការទៅកាន់តំបន់ឥណ្ឌូប៉ាស៊ីហ្វិក ដើម្បីថ្លែងសុន្ទរកថាពេញអង្គ នៅកិច្ចសន្ទនា Shangri-La ក្នុងប្រទេសសិង្ហបុរី នៅថ្ងៃទី០៤ មិថុនា។ បន្ទាប់មក លោកគ្រោងនឹងជួបជាលើកដំបូងជាមួយរដ្ឋមន្ត្រីការពារជាតិចិន លោក Dong Jun ដែលបានចូលកាន់តំណែង កាលពីខែធ្នូឆ្នាំមុន។
ក្នុងដំណើរទស្សនកិច្ចរបស់មន្ត្រីជាន់ខ្ពស់អាម៉េរិករូបនេះ នឹងមកបំពេញទស្សនកិច្ចនៅប្រទេសកម្ពុជា ហើយគ្រោងនឹងជួបជាមួយសម្តេច ហ៊ុន ម៉ាណែត នាយករដ្ឋមន្ត្រីកម្ពុជា ដើម្បីព្យាយាមបង្កើតទំនាក់ទំនងជាមួយកម្ពុជា។ បន្ទាប់មកលោក Austin នឹងបញ្ចប់ដំណើររបស់ខ្លួននៅប្រទេសបារាំង ជាកន្លែងដែលលោកនឹងប្រារព្ធខួបលើកទី៨០ នៃ D-Day ដោយចូលរួមក្នុងព្រឹត្តិការណ៍រំម្លឹកខួបមួយចំនួន។
គួរបញ្ជាក់ថា នេះជាដំណើរទស្សនកិច្ចលើកទី ១០ របស់លោករដ្ឋមន្ត្រី Austin ទៅកាន់តំបន់ឥណ្ឌូប៉ាស៊ីហ្វិក ធ្វើឡើងខណៈដែលក្រសួងការពារជាតិបន្តពង្រឹងទំនាក់ទំនងអាម៉េរិកជាមួយសម្ព័ន្ធមិត្ត និងដៃគូក្នុងការគាំទ្រដល់ចក្ខុវិស័យរួមក្នុងតំបន់សម្រាប់សន្តិភាព ស្ថិរភាព និងការរារាំង៕
