ភ្នំពេញ៖នាវាកងទ័ពជើងទឹករំដោះប្រជាជនចិនចំនួន ០១គ្រឿង លេខ 985 ជាប្រភេទនាវាពហុមុខងារ Type-071 ដឹកនាំដោយឧត្តមនាវីទោ កៅ សៀវឆឹង នាយសេនាធិការរងកងទ័ពជើងទឹក រំដោះប្រជាជនចិនភាគខាងត្បូង បានមកដល់កម្ពុជាហើយនៅថ្ងៃនេះ ដើម្បីចូលរួម«សមយុទ្ធនាគមាស»ប្រចាំឆ្នាំ។បច្ចុប្បន្ននាវាយោធាចិននេះ ចតដល់កំពង់ផែស្វយ័តអន្ដរជាតិក្រុងព្រះសីហនុ និង មានការអញ្ជើញទៅទទួលដោយលោក ម៉ី ឌីណា មេបញ្ជាការមូលដ្ឋានសមុទ្ររាម ។
នាវាយោធានេះ មានបណ្ដោយប្រវែង ២១០ម៉ែត្រ ទទឹងប្រវែង២៨ម៉ែត្រ ជម្រៅទឹកប្រវែង០៧ម៉ែត្រ អាចទំងន់ផ្ទុក២៥០០០តោន។
គួរបញ្ជាក់ថា កងទ័ពកម្ពុជា-ចិន នឹងធ្វើសមយុទ្ធយោធារួមគ្នា ដែលមានឈ្មោះថា «នាគមាស» ដែលជាសមយុទ្ធប្រចាំឆ្នាំ រវាងប្រទេសទាំងពីរ នៅពាក់កណ្តាលខែឧសភានេះ ដោយនឹងមានមានការចូលរួមពីកងទ័ពកម្ពុជា-ចិន សរុបចំនួន ២០៧៥នាក់ ក្នុងនោះកងយុទ្ធពលខេមរភូមិន្ធចំនួន ១៣១៥នាក់ និងកងទ័ពរំដោះប្រជាជនចិនចំនួន ៧៦០នាក់។
សមយុទ្ធនេះ រៀបចំឡើងក្រោមប្រធានបទ «ប្រតិបត្តិការប្រឆាំងអំពើភេរវកម្មរួមគ្នា និង ការសង្រ្គោះមនុស្សធម៌ គឺប្រព្រឹត្តទៅរយៈពេល ១៥ថ្ងៃ ចាប់ពីថ្ងៃទី១៦-៣០ឧសភា ឆ្នាំ២០២៤ នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ក្នុងខេត្តកំពង់ឆ្នាំង៕
.jpg?1715590034)
