ភ្នំពេញ៖ លោក គង់ សភា អតីតំណាងរាស្ត្រ អតីតគណបក្សសង្គ្រោះជាតិ ទទួលស្គាល់កំហុស បានស្នើសម្តេច ហ៊ុន ម៉ាណែត នាយករដ្ឋមន្ត្រីកម្ពុជា អន្តរាគមន៍លើកលែងទោស ដើម្បីលោកអាចវិលមកខ្មែរវិញ និងជួបជុំគ្រួសារ មើលថែឪពុកម្តាយចាស់ជរា។ការស្នើសុំនេះ ត្រូវបានទទួលការស្វាគមន៍ពីសម្តេចនាយករដ្ឋមន្ត្រីកម្ពុជា។
តាមរយៈបណ្តាយសង្គម សម្តេច ហ៊ុន ម៉ាណែត បានសរសេរប្រកាសស្វាគមន៍ចំពោះសំណើររបស់លោក គង់ សភា អតីតំណាងរាស្ត្រ អតីតគណបក្សសង្គ្រោះជាតិ ហើយសម្តេចនាយករដ្ឋមន្ត្រីនឹងចាត់ចែងតាមនីតិវិធីដើម្បី អោយលោកអាចវិលត្រឡប់មកកាន់មាតុប្រទេសវិញ។
សម្តេច ហ៊ុន ម៉ាណែត បានសរសេរថា "ជូនចំពោះលោក គង់ សភា ខ្ញុំបានទទួលរួចហើយនូវលិខិតសូមអភ័យទោសរបស់លោកដែលផ្ញើមកឲ្យខ្ញុំ។ ខ្ញុំសូមស្វាគមន៍លោក។ខ្ញុំនឹងចាត់ចែងតាមនីតិវិធីដើម្បី អោយលោកអាចវិលត្រឡប់មកកាន់មាតុប្រទេសវិញ។សង្ឃឹមថាយើងនឹងមានឱកាសជួប សន្ទនាជាមួយគ្នានៅពេលខាងមុខ។"
តាមរយៈសារនេះ ត្រូវបានអ្នកវិភាគយល់ថា លោក គង់ សភា នឹងក្លាយជាអ្នកនយោបាយប្រឆាំងទី១ដែលទទួលបានការអភ័យទោស និងលើកលែងទោសពីព្រះមហាក្សត្រតាមរយៈការជួយអន្តរាគមន៍ពីសម្តេច ហ៊ុន ម៉ាណែត ក្នុងនាមជានាយករដ្ឋមន្រ្តីនៃកម្ពុជានាអាណត្តិទី៧នេះ។
សូមរម្លឹកជូនថា លោក គង់ សភា ជាកូនប្រុសមួយរូបរបស់លោក គង់ គាំ ធ្លាប់រងការវាយដំឲ្យរបួសធ្ងន់ក្នុងបាតុកម្ម កាលពីឆ្នាំ២០១៥ ដោយនៅពេលនោះលោក គង់ សភា នៅជាតំណាងរាស្ត្រ។ លោកគង់ សភា ត្រូវបានគណៈកម្មការរៀបចំការបោះឆ្នោតរាជធានីភ្នំពេញលុបឈ្មោះចេញពីបញ្ជីបោះឆ្នោត និង ដកសិទ្ធិលោកមិនឱ្យឈរឈ្មោះឲ្យគេបោះឆ្នោតចំនួន ២០ឆ្នាំកាលពីខែកក្កដា ឆ្នាំ២០២៣។
ថ្ងៃទី៩ ខែកុម្ភៈ ឆ្នាំ២០២៤ លោក គង់ សភា បានផ្ញើលិខិត ទៅកាន់សម្តេច ហ៊ុន ម៉ាណែត ឱ្យជួយអន្តរាគមន៍ថ្វាយព្រះមហាក្សត្រប្រោសប្រទានការលើកលែងទោសទណ្ឌទាំងឡាយ ដើម្បីឲ្យលោកអាចនឹងវិលចូលប្រទេសជាតិវិញមើលថែឪពុកម្ដាយដែលចាស់ជរា។លោកបានបង្ហាញការសោកស្ដាយដោយបញ្ជាក់ថា រាល់ទង្វើ និង សកម្មភាពមួយចំនួនកន្លងមកបានធ្វើឱ្យប៉ះពាល់ដល់ការអភិវឌ្ឍ សន្ដិភាព ស្ថិរភាព និង គោលនយោបាយនានារបស់រដ្ឋាភិបាល៕
