ភ្នំពេញ៖ ពិធីបុណ្យចូលឆ្នាំថ្មី ប្រពៃណីជាតិខ្មែរ នឹងចាប់ផ្តើមនៅចុងសប្តាហ៍នេះ។មុនចូលឆ្នាំចូលមកដល់ ប្រជាពលរដ្ឋកម្ពុជាដែលធ្វើការ និង សិក្សារនៅក្រៅប្រទេស ជាពិសេស នៅប្រទេសថៃ វៀតណាម ឡាវ បានធ្វើដំណើរចូលប្រទេសវិញ ជាមួយការមិនតម្រូវបង់ប្រាក់ពីអាជ្ញាធរនៃប្រទេសជិតខាងកម្ពុជា។
ក្រោមពីប្រកាសអំពាវនាវពីប្រមុខរាជរដ្ឋាភិបាលកម្ពុជា និង ការលើកលែងបង់ប្រាក់ពេលចូលប្រទេស គេឃើញមានប្រជាពលរដ្ឋកម្ពុជា ទាំងពលករ និង សិស្សនិស្សិតកំពុងសិក្សានៅក្រៅប្រទេស បានធ្វើដំណើរចូលប្រទេសកម្ពុជាវិញ។
នៅថ្ងៃអាទិត្យទី៧ ខែមេសានេះ មន្ត្រីកម្ពុជាដែលរួមមាន អគ្គកុងស៊ុល មន្ត្រីក្រសួងការងារ អនុព័ន្ធការងារអមស្ថានទូតកម្ពុជានៅថៃ និងអាជ្ញាធរពាក់ព័ន្ធបានចុះជួយ សម្របសម្រួលផ្នែកឯកសារដល់ពលរដ្ឋខ្មែរនៅច្រកព្រំដែនខាងប្រទេសថៃ ដែលជាទីត្រូវបំពេញនីតិវិធីមុនពេលបានចាកចេញមកកម្ពុជា ខណៈដែលពលរដ្ឋខ្មែរកាន់តែច្រើនបានសម្រុកចាកចេញមកស្រុកកំណើតសម្រាប់ពិធីបុណ្យចូលឆ្នាំប្រពៃណីជាតិខាងមុខ។
លោក សាន គីមហុង អនុរដ្ឋលេខាធិការក្រសួងការងារ និងជាប្រធានក្រុមការងារនៅច្រកទ្វារអន្តរជាតិប៉ោយប៉ែត លើកឡើងថា៖«មន្ត្រីយើងបានចុះទៅជួយសម្រួលឯកសារដល់បងប្អូនពលករ ដើម្បីឱ្យគាត់ចេញមកបានលឿន រហ័ស ដោយមិនអស់ថរិកាអ្វីទាំងអស់»។
គួរបញ្ជាក់ថា ពលរដ្ឋខ្មែរដែលវិលមកកម្ពុជាវិញដោយឥតគិតថ្លៃ តាមការព្រមព្រៀងរវាងប្រមុខរដ្ឋាភិបាលកម្ពុជា-ថៃ ដែលជាកាដូជូនពលរដ្ឋទាំងសងខាង សម្រាប់ពិធីបុណ្យចូលឆ្នាំប្រពៃណីជាតិ។យោងតាមសេចក្តីប្រកាសរបស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃនៅថ្ងៃទី៦ ខែមេសា ឆ្នាំ២០២៤ ពលរដ្ឋខ្មែរដែលធ្វើដំណើរត្រឡប់ពីប្រទេសថៃវិញ មានចំនួនជាង ៩ម៉ឺន៧ពាន់នាក់ ខណៈដែលពលករមានជាង ៣ម៉ឺន១ពាន់នាក់៕
