ភ្នំពេញ៖ គណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា នាព្រឹកថ្ងៃទី២១ ខែមីនា បានបើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និង លើកទិសដៅការងារបន្ត ក្រោមអធិបតីភាពសម្ដេច ម៉ែន សំអន អនុប្រធានគណបក្សប្រជាជនកម្ពុជា និង ជាប្រធានគណៈចលនាមហាជន។
លោក នួន ផារ័ត្ន អគ្គលេខាធិការរងនៃគណៈចលនាមហាជនបានធ្វើរបាយការណ៍អំពីសមិទ្ធផលនានាដែលសម្រេចបានដោយគណៈចលនាជំនាញទាំង៤ របស់គណៈចលនាមហាជនដោយក្នុងនោះរួមមាន៖ គណៈចលនាយុវជន គណៈចលនាស្រ្តី គណៈចលនាសហជីព គណៈចលនាអង្គការ សមាគមន៍ និងដៃគូរអភិវឌ្ឍន៍ ដែលកន្លងមកបានខិតខំប្រឹងប្រែងបំពេញការងារយ៉ាងសកម្មក្នុងការដឹកនាំ តម្រង់ទិស និងសម្របសម្រួលជាប្រចាំ ជាមួយរចនាសម្ព័ន្ធចាត់តាំងតាមក្រសួង-ស្ថាប័ន រាជធានី-ខេត្ត ក្នុងការតាមដាន គាំទ្រ និងអនុវត្តយ៉ាងម៉ត់ចត់នូវវិធានការ និងអនុសាសន៍នានារបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស។ ជាមួយគ្នានេះដែរ អគ្គលេខាធិការដ្ឋានបានបន្តតាមដាន ស្វែងយល់អំពី បញ្ហាប្រឈម សភាពការណ៍ និង សតិអារម្មណ៍មហាជន តាមរាជធានី-ខេត្តជាប្រចាំ ដើម្បីឱ្យការអនុវត្តការងារកាន់តែប្រសើរឡើងស្របតាមទិសដៅឆ្ពោះទៅមុខរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម់ាណែត ជានាយករដ្ឋមន្រ្តី។
គួរបញ្ជាក់ដែរ កិច្ចប្រជុំនេះ បានរៀបចំឡើងក្នុងគោលបំណងបូកសរុបលទ្ធផលការងារសំខាន់ៗ ក្នុងឆ្នាំ២០២៣កន្លងទៅព្រមទាំងកំណត់នូវការវាយតម្លៃជារួម ទៅលើបញ្ហាប្រឈម សំណូមពរ និងទិសដៅការងារបន្ត សំដៅចូលរួមគាំទ្រដល់ការដឹកនាំរបស់គណបក្ស និងរាជរដ្ឋាភិបាល ក្នុងការបម្រើជាតិ មាតុភូមិ និងប្រជាជន។
