វៀតណាមឃាត់ឡានដឹក«ក្រពើ៤០០ក្បាល»នាំចេញពីកម្ពុជា

វៀតណាម៖ ប៉ូលីសវៀតណាមបានឃាត់រថយន្តដឹកក្រពើប្រមាណ៤០០ក្បាលទម្ងន់សរុប៥តោននៅក្នុងខេត្តដុងថាបភាគខាងត្បូងជាប់ព្រំដែនកម្ពុជា។ ប៉ូលីស Dong Thap បានបើកការស៊ើបអង្កេតលើការរំលោភលើបទប្បញ្ញត្តិស្តីពីការគ្រប់គ្រង និងការការពារសត្វកម្រជិតផុតពូជ។ នេះបើយោងតាមការចុះផ្សាយរបស់កាសែតវៀតណាម VN Express។

បើតាមមន្រ្តីវៀតណាមបានឲ្យដឹងថារថយន្តដឹកជញ្ជូនបើកបរដោយលោក Nguyen Van Luan អាយុ៣៧ឆ្នាំ កាលពីថ្ងៃទី២៤ ខែមករា មានក្រពើចំនួន ៣៩១ក្បាល។ លោក Luan បាននិយាយថា គាត់បានទិញក្រពើពីប្រទេសកម្ពុជា ហើយហៀបនឹងលក់វាចូលក្នុងប្រទេសវៀតណាម។ បច្ចុប្បន្នក្រពើទាំងនោះត្រូវបានគេនាំយកទៅចិញ្ចឹមនៅកសិដ្ឋានក្នុងស្រុករង់ចាំនីតិវិធីបន្ត៕