ភ្នំពេញ៖ ប្រមុខរាជរដ្ឋាភិបាលកម្ពុជា សម្តេច ហ៊ុន ម៉ាណែត នៅថ្ងៃទី ២១ ធ្នូនេះ បានចេញបទបញ្ជាដល់រដ្ឋមន្ត្រីចំនួន២រូបពិនិត្យពីបុគ្គលដែលរៀបចំសកម្មភាពយកសាសនាធ្វើអាជីវកម្មផ្ទាល់ខ្លួន។ការចេញបទបញ្ជានេះ ធ្វើឡើងក្រោយពីសម្តេចនាយករដ្ឋមន្ត្រីសង្កេតឃើញមានបុគ្គលមួយចំនួនតាំងខ្លួនជាព្រះហើយបោកប្រាស់ដល់ប្រជាពលរដ្ឋនាំឱ្យប៉ះពាល់ដល់តម្លៃនៃសាសនា។
រដ្ឋមន្ត្រីចំនួន២រូបនោះមាន រដ្ឋមន្ត្រីក្រសួងធម្មការ និង សាសនា និង រដ្ឋមន្ត្រីក្រសួងយុត្តិធម៌ ត្រូវធ្វើការរួមគ្នាដើម្បីស្រាវជ្រាវនិងពិនិត្យពីភាពអនាធិបតេយ្យលើបុគ្គលមួយចំនួនដែលយកសាសនាធ្វើអាជីវកម្មទាញយកផលប្រយោជន៍ផ្ទាល់ខ្លួន។ការចេញបទបញ្ជានេះធ្វើឡើងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងបរិស្ថាន។
