កំពង់ឆ្នាំង៖ សិស្សានុសិស្សចំនួន ១៩០នាក់ បានទទួលការបណ្ដុះបណ្ដាលផ្នែកសុវត្ថិភាពចំណីអាហារក្នុងសាលារបស់ពួកគេពីមន្រ្តីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៅស្រុករលាប្អៀរ នៃខេត្តកំពង់ឆ្នាំង។
សិស្សានុសិស្សនៅក្នុងសាលាតេជោសែនទឹកហូត ដែលស្ថិតនៅស្រុករលាប្អៀរ នៃខេត្តកំពង់ឆ្នាំងចំនួន ១៩០នាក់ បានទទួលការបណ្ដុះបណ្ដាលស្ដីពីសុវត្ថិភាពម្ហូបអាហារ ឬភាសាសាមញ្ញគឺចំណីអាហារដែលបរិភោគជាប្រចាំថ្ងៃទាំងក្នុងសាលារៀន និងក្រៅសាលាផងដែរ។
កម្មវិធីបណ្ដុះបណ្ដាលនេះ មានការចូលរួមពីសំណាក់លោកគ្រូ អ្នកគ្រូ អាជីវករក្នុងសាលារៀន និងមន្រ្តីជំនាញពាក់ព័ន្ធនៅទីនោះ ដែលក្នុងការបណ្ដុះបណ្ដាលនេះគឺមានគោលបំណងអប់រំ ផ្សព្វផ្សាយទៅកាន់សិស្សានុសិស្សឱ្យបានយល់ ជ្រួតជ្រាបអំពីអ្វីទៅម្ហូបអាហារ ឬចំណីអាហារដែលគ្មាន និងមានសុវត្ថិភាពសម្រាប់សុខភាព និងផលប៉ះពាល់ពីការបរិភោគម្ហូបអាហារដែលគ្មានសុវត្ថិភាពទាំងអស់នោះ។
កម្មវិធីបណ្ដុះបណ្ដាលនេះ រួមចំណែកយ៉ាងច្រើនក្នុងការជួយឱ្យប្រជាជន ពិសេសក្មេងៗជំនាន់ក្រោយឱ្យមានសុខភាពល្អ និងក្លាយជាចលករយ៉ាងសំខាន់ក្នុងការកសាងមាតុប្រទេសឱ្យមានការីកចម្រើនលូតលសាស់ក្នុងសម័យសន្តិភាពនេះ៕
