ញូវយ៉ក៖ លោក Charlie Munger ដែលជាមហាសេដ្ឋីអាម៉េរិកមានទឹកប្រាក់ជាង ៣ពាន់លានដុល្លារ និងជាដៃគូអាជីវកម្មរបស់វិនិយោគិនអាម៉េរិកដ៏ល្បីល្បាញ និងក៏ជាមិត្តរបស់លោក Warren Buffett បានទទួលមរណភាពកាលពីថ្ងៃអង្គារក្នុងអាយុ ៩៩ឆ្នាំ។ លោក Munger បានបម្រើការងារជាច្រើនទសវត្សរ៍ជាអនុប្រធានក្រុមហ៊ុន Berkshire Hathaway ក្រោមការដឹកនាំរបស់លោក Buffett។
លោក Warren Buffett បាននិយាយនៅក្នុងសេចក្តីថ្លែងការណ៍មួយថាក្រុមហ៊ុន "Berkshire Hathaway មិនអាចត្រូវបានកសាងឡើងដោយជោគជ័យប្រសិនបើគ្មានការបំផុសគំនិត ប្រាជ្ញា និងការចូលរួមរបស់លោក Charlie" នោះទេ ការបាត់បង់វត្តមានរបស់លោក Charlie Munger គឺជាការបាត់បងធនធានមនុស្សដ៏សំខាន់មួយក្នុងពិភពលោក ។
លោក Buffett លោក Munger កើត និងធំធាត់នៅ Omaha រដ្ឋ Nebraska អ្នកទាំងពីរបានជួបគ្នា ក្នុងឆ្នាំ ១៩៥៩ ហើយបានបង្កើតមិត្តភាពដែលមានរយៈពេលជាង ៦០ ឆ្នាំ។លោក Munger បានចូលរួមជាមួយលោក Buffett និងធ្វើការនៅក្រុមហ៊ុន Berkshire Hathaway ជាអនុប្រធានក្នុងឆ្នាំ ១៩៧៨ ហើយបានជួយផ្លាស់ប្តូរវាពីក្រុមហ៊ុនវាយនភ័ណ្ឌតូចមួយទៅជាក្រុមហ៊ុនដ៏ធំសម្បើមដែលឥឡូវនេះមានតម្លៃជាង ៧៨០ ពាន់លានដុល្លារ។ ទ្រព្យសម្បត្តិរបស់លោក Charlie Munger ត្រូវបានគេប៉ាន់ស្មានថាមានចំនួនតិចតួចជាង ២.៦ ពាន់លានដុល្លារ បើទោះបីជាគាត់បានបរិច្ចាគទ្រព្យសម្បត្តិភាគច្រើនរបស់គាត់ទៅអង្គការសប្បុរសធម៌ជាច្រើនកន្លងមកក៏ដោយ៕
