សាន់ហ្វ្រាន់ស៊ីស្កូ៖លោកប្រធានាធិបតីចិន ស៊ី ជីនពីង នៅថ្ងៃទី ១៤ វិច្ឆិកាម្សិលមិញ បានទៅដល់ទីក្រុងសាន់ហ្វ្រាន់ស៊ីស្កូរបស់សហរដ្ឋអាម៉េរិកហើយ ដើម្បីចូលរួមកិច្ចប្រជុំអង្គការសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក ហៅកាត់ថា APEC ដែលចាប់ផ្តើមពីថ្ងៃទី១១ ដល់ទី១៧ វិច្ឆិកា ទីក្រុងសាន់ហ្វ្រាន់ស៊ីស្កូ។ការទៅដល់របស់លោកសុីនៅពេលនេះ ដោយមានការទទួលស្វាគមន៍យ៉ាងកក់ក្តៅពីមន្ត្រីជាន់ខ្ពស់អាម៉េរិក។តាមការគ្រោងទុក លោកប្រធានាធិបតីចិន ស៊ី ជីនពីង នឹងជួបប្រជុំទ្វេរភាគី ជាមួយលោកប្រធានាធិបតី ចូ បៃដិន។ ជំនួបដ៏សំខាន់នេះ ត្រូវគេរំពឹងថា អាចនឹងនាំឲ្យមានការសម្របសម្រួលគ្នា ក្នុងទំនាក់ទំនងរវាងចិននិងអាមេរិក ដែលកំពុងតែល្អក់កករខ្លាំង។
ការអញ្ជើញដល់របស់លោកប្រធានាធិបតីចិន ស៊ី ជីនពីង លើទឹកដីអាម៉េរិក មានការទទួលស្វាគមន៍ដោយអភិបាលរដ្ឋកាលីហ្វ័រញ៉ា រដ្ឋលេខាធិការរតនាគារសហរដ្ឋអាម៉េរិក និង អ្នកតំណាងអាម៉េរិកផ្សេងទៀតនៅអាកាសយានដ្ឋានអន្តរជាតិសាន់ហ្វ្រាន់ស៊ីស្កូ។
ក្នុងពេលមានវត្តមានលើទឹកដីអាម៉េរិកនៅពេលនេះ លោកប្រធានាធិបតីចិន ស៊ី ជីនពីង នឹងជួបប្រជុំទ្វេរភាគី ជាមួយលោកប្រធានាធិបតី ចូ បៃដិន ដែលគេរំពឹងថានឹងនិយាយគ្នាស៊ីជម្រៅ ស្តីអំពីបញ្ហាទូទៅផង និង បញ្ហាយុទ្ធសាស្ត្រផង ដោយផ្តោតសំខាន់ទៅលើទំនាក់ទំនង រវាងចិន និងសហរដ្ឋអាម៉េរិក។ជំនួបនេះនឹងក្លាយជាជំនួបទល់មុខគ្នាលើកដំបូងរវាងប្រធានាធិបតីទាំងពីរ ចាប់តាំងពីកិច្ចប្រជុំនៅកោះបាលី ប្រទេសឥណ្ឌូនេស៊ីកាលពីមួយឆ្នាំមុន។
នៅក្នុងសន្និសីទកាសែតនៅព្រឹកថ្ងៃចន្ទ ទី១៣វិច្ឆិកា លោកស្រី Mao Ning អ្នកនាំពាក្យក្រសួងការបរទេសចិន បានបញ្ជាក់ថា ប្រធានាធិបតីទាំង២ នឹងនិយាយអំពី សន្តិភាព និងការអភិវឌ្ឍន៍ ហើយថែមទាំងបានអំពាវនាវឲ្យអាម៉េរិក ត្រូវតែគោរពដោយស្មោះត្រង់ ចំពោះការព្រួយបារម្ភដ៏សមហេតុសមផលរបស់ចិន ព្រមទាំងសិទ្ធិស្របច្បាប់របស់ចិនក្នុងការអភិវឌ្ឍន៍ ជាជាងការគិតខ្វល់តែប្រយោជន៍ខ្លួនឯង ហើយគិតតែពីដាក់ឧបសគ្គរំខានរារាំងមកលើចិន។
ចំណែកអ្នកនាំពាក្យសេតវិមាន អាម៉េរិកវិញ បានបញ្ជាក់ឲ្យដឹងថា ប្រធានាធិបតីទាំង២ នឹងនិយាយអំពី បញ្ហាទ្វេរភាគី បញ្ហាតំបន់ និងពិភពលោកផង ព្រមទាំងអំពីការរិះរកមធ្យោបាយ ដើម្បីគ្រប់គ្រងឲ្យការប្រកួតប្រជែងគ្នា មានលក្ខណៈទទួលខុសត្រូវ។
សាន់ហ្វ្រាន់ស៊ីស្កូ គឺជាទីក្រុងម្ចាស់ផ្ទះនៃកិច្ចប្រជុំអាស៊ីប៉ាស៊ីហ្វិក ហៅកាត់ថា APEC ដោយមានប្រធានបទ "ការបង្កើតភាពធន់ និង អនាគតប្រកបដោយនិរន្តរភាពសម្រាប់ទាំងអស់គ្នា"។មន្ត្រីអមដំណើររបស់លោកសុី មាន សមាជិកគណៈកម្មាធិការអចិន្ត្រៃយ៍នៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន (CPC) និង ជានាយកការិយាល័យទូទៅនៃគណៈកម្មាធិការកណ្តាលចិន និងលោក Wang Yi សមាជិកការិយាល័យនយោបាយនៃ គណៈកម្មាធិការកណ្តាល CPC និងរដ្ឋមន្ត្រីការបរទេស៕
