ភ្នំពេញ៖ សាកលវិទ្យាល័យភូមិន្ទភ្នំពេញ បានប្រកាសពីការប្រឡងចូលសិក្សាថ្នាក់ឆ្នាំមូលដ្ឋាន ឆ្នាំសិក្សា ២០២៣-២០២៤។ កាលបរិច្ឆេទនៃការទទួលពាក្យចុះឈ្មោះប្រឡងប្រព្រឹត្តទៅចាប់ពីថ្ងៃទី១៣ វិច្ឆិកា រហូតដល់ថ្ងៃទី១៦ ធ្នូ ឆ្នាំ២០២២៣។
សាកលវិទ្យាល័យភូមិន្ទភ្នំពេញ មានមហាវិទ្យាល័យចំនួន៥ រួមមាន មហាវិទ្យាល័យវិទ្យាសាស្ត្រ មហាវិទ្យាល័យវិស្វកម្ម មហាវិទ្យាល័យវិទ្យាសាស្ត្រសង្គម និងមនុស្សសាស្ត្រ មហាវិទ្យាល័យសិក្សាអភិវឌ្ឍន៍ និងមហាវិទ្យាល័យអប់រំ រួមទាំងវិទ្យាស្ថានចំនួន២ គឺវិទ្យាស្ថានភាសាបរទេស និងវិទ្យាស្ថានសិក្សាអន្តរជាតិ និងគោលនយោបាយ ។
សូមបញ្ជាក់ថា សាកលវិទ្យាល័យភូមិន្ទភ្នំពេញ បានបង្កើតឡើងនៅក្នុងឆ្នាំ១៩៦០ និងមានឈ្មោះថា សាកលវិទ្យាល័យភូមិន្ទខ្មែរ។ ប៉ុន្តែក្នុងសម័យសាធារណរដ្ឋខ្មែរ សាកលវិទ្យាល័យភូមិន្ទខ្មែរបានចាប់ផ្ដើមដូរឈ្មោះទៅជាសាកលវិទ្យាល័យភូមិន្ទភ្នំពេញ ខណៈនៅចន្លោះឆ្នាំ១៩៧៥ ដល់ឆ្នាំ១៩៧៩ ស្ថិតក្នុងរបបខ្មែរក្រហម សាកលវិទ្យាល័យនេះត្រូវបានបង្ខំឲ្យបិទចោល។ នៅឆ្នាំ១៩៨១ សាកលវិទ្យាល័យភូមិន្ទភ្នំពេញក៏បានបង្កើតឡើងវិញ ក្រោយពីថ្ងៃរំដោះ ៧ មករា ឆ្នាំ១៩៧៩ កម្ពុជា បានចាប់ផ្ដើមកសាង និងបើកឲ្យដំណើរការប្រព័ន្ធអប់រំឡើងវិញ៕
