ភ្នំពេញ៖ ក្រុមកីឡាទូកនាគជម្រើសជាតិកម្ពុជា នៅថ្ងៃទី ៣០ តុលា បានមេដាយមាសជាលើកដំបូងក្នុងការប្រកួតកីឡាទូកនាគអន្តរជាតិ លើកទី៩ ឆ្នាំ២០២៣ ដែលមានប្រទេសចំនួន១៨ ចូលរួម នៅទីក្រុង Sarawak ប្រទេសម៉ាឡេស៊ី ។
យោងតាមអគ្គនាយកដ្ឋានកីឡា បានឲ្យដឹងថា នៅក្នុងវគ្គជុំទី១ (Heat) ក្រុមកីឡាករទូកនាគកម្ពុជា បានប្រកួតឈ្នះឈរចំណាត់ថ្នាក់លេខ១ និងបានបន្តទៅវគ្គពាក់កណ្តាលផ្តាច់ព្រ័ត្រ(Semi final) ដែលក្រុមទូកនាគកម្ពុជា នៅតែរក្សាដំណែងចំណាត់ថ្នាក់លេខ១ បន្តទៀតដែលនាំឱ្យក្រុមឈានដល់វគ្គផ្តាច់ព្រ័ត្រ(final) ក្រុមទូកនាគកម្ពុជា ក៏បានប្រជែងយកបានលេខ១ ដោយទទួលបានមេដាយមាស នៅក្នុងកីឡាទូកនាគអន្តរជាតិ លើកទី៩ ឆ្នាំ២០២៣ នេះ។
កញ្ញា មាស តឿ អគ្គលេខាធិការសហព័ន្ធកីឡាទូកកានូ និងរ៉ូអ៊ីងកម្ពុជា បានគូសបញ្ជាក់ថា ការប្រកួតកីឡាទូកនាគអន្តរជាតិលើកទី៩ ឆ្នាំ២០២៣ នេះជាលើកដំបូងសម្រាប់កម្ពុជាការប្រកួតកីឡាទូកនាគអន្តរជាតិ។
គួរបញ្ជាក់ថា ការប្រកួតកីឡាទូកនាគអន្តរជាតិ បានចាប់ផ្តើមពីថ្ងៃទី២៦ រហូតដល់ថ្ងៃទី៣០ ខែតុលា ឆ្នាំ២០២៣ មានប្រទេសចំនួន១៨ ចូលរួម ដែលក្នុងនោះរួមមាន ម្ចាស់ផ្ទះម៉ាឡេស៊ី មីយ៉ាន់ម៉ា កាតា អេស្ប៉ាញ ចិនហុងកុង ចិន ឥណ្ឌូណេស៊ី ព្រុយណេ កោះតៃវ៉ាន់ រុស្ស៊ី ចក្រភពអង់គ្លេស អូស្ត្រាលី សហរដ្ឋអាមេរិក ហ្វីលីពីន ថៃ អៀរឡង់ ជប៉ុន និងកម្ពុជា៕
