ប៉េកាំង៖ ប្រទេសចិនបានដកលោក Li Shangfu ចេញពីតំណែងជារដ្ឋមន្ត្រីការពារជាតិ និងជាទីប្រឹក្សារដ្ឋ ដែលជាការទម្លាក់មេដឹកនាំជាន់ខ្ពស់ជាលើកទីពីរក្នុងរយៈពេលបីខែ។លោក Qin Gang ដែលត្រូវបានដកចេញពីតំណែងជារដ្ឋមន្ត្រីការបរទេសកាលពីខែកក្កដា ក៏ត្រូវបានដកចេញពីតំណែងទីប្រឹក្សារដ្ឋរបស់លោកផងដែរកាលពីថ្ងៃអង្គារ។ទូរទស្សន៍រដ្ឋ CCTV បានរាយការណ៍ថា សមាជិកសភាកំពូលរបស់ប្រទេសចិន គណៈកម្មាធិការអចិន្ត្រៃយ៍នៃសភាប្រជាជនជាតិបានអនុម័តលើការដកចេញប្រមុខរដ្ឋទាំងពីរ ស្របពេលដែលមិនមានការពន្យល់ជុំវិញនៃការដកតំណែងលោកទាំងពីរចេញឡើយ។ បច្ចុប្បន្ននេះពុំទាន់មានអ្នកជំនួសតំណែងលោក Li ត្រូវបានតែងតាំងនៅឡើយនោះទេ។
យោងតាមទូរទស្សន៍ CCTV បានឱ្យដឹងថា រដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា លោក Wang Zhigang និងរដ្ឋមន្ត្រីហិរញ្ញវត្ថុ Liu Kun ក៏ត្រូវបានដកចេញពីមុខតំណែងផងដែរ ដោយជំនួសមកវិញដោយលេខាធិការគណបក្សក្រសួងវិទ្យាសាស្ត្រ និងបច្ចេកវិទ្យាបច្ចុប្បន្ន លោក Yin Hejun និងលេខាធិការគណបក្សក្រសួងហិរញ្ញវត្ថុ Lan Fo'an៕
