ភ្នំពេញ៖ យុវជន សុក ខៀវ សមិទ្ធិ គឺជាអ្នកនិពន្ធវ័យក្មេង ជាម្ចាស់សៀវភៅប្រលោមលោកប្រឌិតបែបវិទ្យាសាស្រ្តទី៤ ដែលមានឈ្មោះថា The Wildland-Sons of the Empire ដែលមានប្រមាណជា១១៥.០០០ពាក្យជាភាសាអង់គ្លេស។យុវជន សុក ខៀវ សមិទ្ធិ នៅថ្ងៃអាទិត្យ ទី២២ ខែតុលា ឆ្នាំ២០២៣ បានទទួលមរណភាព ក្នុងជន្មាយុ២២ឆ្នាំ ដោយរោគាពាធ។
ជាដំណឹងដ៏សោកសៅនៅពេលដែលដឹងថា យុវជន សុក ខៀវ សមិទ្ធិ ទាំងវ័យក្មេង។ យុវជន សុក ខៀវ សមិទ្ធិ គឺជាត្រូវជាកូនប្រុសបង្កើតបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស។នៅឆ្នាំ២០១៣ វ័យ១៥ឆ្នាំ ក្នុងនាមជាសិស្សថ្នាក់ទី៩ យុវជន សុក ខៀវ សមិទ្ធិ បានសម្ភោធសៀវភៅប្រលោមលោកប្រឌិតបែបវិទ្យាសាស្រ្តទី៤ ដែលនឹងមាន៣ភាគ។
សៀវភៅប្រលោមលោកនោះ មានចំណងជើងជាភាសាអង់គ្លេសថា The Wildland-Sons of the Empire ដែលមានប្រមាណជា ១១៥.០០០ពាក្យជាភាសាអង់គ្លេស។ រឿងនេះបានឆ្លុះបញ្ចាំងពីរឿងរ៉ាវនៅក្នុងឆ្នាំ ១៨០០ នៅពេលដែលទាហានជនជាតិអង់គ្លេសមួយរូប ឈ្មោះលោក Jared Connors បានឆ្លងទៅកាន់ភព Beos ដើម្បីធ្វើសង្រ្គាម។
កាលនៅកុមារភាព យុវជន សុក ខៀវ សមិទ្ធិ ត្រូវបានម៉ាក់ប៉ារបស់គាត់អានរឿងនិទានជាច្រើនឱ្យគាត់ស្តាប់ និង ចូលចិត្តអានសៀវភៅ រហូតក្លាយជាអ្នកនិពន្ធទាំងវ័យក្មេង។
យុវជន សុក ខៀវ សមិទ្ធិ បានចំណាយទាំងកម្លាំងកាយនិងចិត្តពេលនិពន្ធសៀវភៅ ហើយទន្ទឹមនឹងនេះ រូបគេនឹងបរិច្ចាគប្រាក់ដែលបានពីការលក់សៀវភៅទៅមន្ទីរពេទ្យគន្ធបុប្ផា២៥% ផងដែរ។
បច្ចុប្បន្នសព យុវជន សុក ខៀវ សមិទ្ធិ ត្រូវបានតម្កល់ទុក ដើម្បីរៀបចំពិធីបុណ្យទៅតាមប្រពៃណី ព្រះពុទ្ធសាសនា នៅភូមិគ្រឹះសាស្ត្រាចារ្យបណ្ឌិតសភាចារ្យទេសរដ្ឋមន្ត្រី ដែលមានទីតាំងស្ថិតនៅ ផ្ទះលេខ៣៤ ភូមិព្រែករកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
