ម៉ិកស៊ិក៖ រថយន្តក្រុងដឹកជនចំណាកស្រុកបានក្រឡាប់នៅភាគខាងត្បូងប្រទេសម៉ិកស៊ិកកាលពីថ្ងៃសុក្រ បណ្តាលឲ្យអ្នកដំណើរយ៉ាងតិច ១៨ នាក់ស្លាប់ និង ២៧ នាក់រងរបួស។ យោងតាមសេចក្តីថ្លែងការណ៍របស់ការិយាល័យរដ្ឋអាជ្ញាក្នុងរដ្ឋ Oaxaca បានឱ្យដឹងថាក្នុងនោះមានអ្នកស្លាប់បីនាក់ជាអនីតិជនមកពីប្រទេស Venezuela និង Haiti ។ ឧបទ្ទវហេតុនេះបានកើតឡើងនៅប្រហែលព្រឹកព្រលឹមនៅលើផ្លូវហាយវ៉េដែលតភ្ជាប់ Oaxaca និងរដ្ឋជិតខាង Puebla។ អ្នករងរបួសត្រូវបានបញ្ជូនទៅមន្ទីរពេទ្យដើម្បីព្យាបាល។រូបភាពដែលចេញផ្សាយដោយអាជ្ញាធររដ្ឋ បង្ហាញពីបំណែកនៃរថយន្តក្រុង ដែលក្រឡាប់នៅចំហៀងខ្លួន នៅលើផ្លូវហាយវេ កាត់តាមភ្នំ។
ជនចំណាកស្រុករាប់ពាន់នាក់មកពីប្រទេសផ្សេងៗគ្នាបានធ្វើដំណើរឆ្លងកាត់ប្រទេសម៉ិកស៊ិកដោយរថយន្តក្រុង រថយន្តសណ្តោងដែលចង្អៀត និងនៅលើរថភ្លើងដឹកទំនិញក្នុងការប៉ុនប៉ងចូលទៅដល់ព្រំដែនអាម៉េរិក-ម៉ិកស៊ិក។ពួកគេប្រឈមនឹងគ្រោះថ្នាក់ធ្ងន់ធ្ងរ ការចាប់ជំរិតដោយក្រុមឧក្រិដ្ឋជន និងការជំរិតទារប្រាក់ដោយមន្ត្រីពុករលួយ។ ជនចំណាកស្រុកជាង ៨,២០០ នាក់បានស្លាប់ នឹងបាត់ខ្លួននៅក្នុងទឹកដីអាម៉េរិកចាប់តាំងពីឆ្នាំ ២០១៤ ដែលភាគច្រើនពួកគេកំពុងព្យាយាមទៅដល់សហរដ្ឋអាម៉េរិកតាមរយៈម៉ិកស៊ិក។
អង្គការអន្តរជាតិសម្រាប់ការធ្វើចំណាកស្រុកបានអះអាងកាលពីខែមុនថា ព្រំដែនសហរដ្ឋអាម៉េរិក-ម៉ិកស៊ិក គឺជា "ផ្លូវគោកចំណាកស្រុកដែលមានមនុស្សស្លាប់ច្រើនជាងគេបំផុតក្នុងពិភពលោក" ដោយមានអ្នកស្លាប់ និងបាត់ខ្លួនចំនួន ៦៨៦ នាក់ក្នុងឆ្នាំ ២០២២ ។កាលពីថ្ងៃអាទិត្យ ជនចំណាកស្រុកគុយបាយ៉ាងតិច ១០នាក់បានស្លាប់ និង ២៥នាក់រងរបួស នៅពេលដែលរថយន្តដឹកទំនិញមួយគ្រឿងដែលដឹកពួកគេក្រឡាប់នៅក្នុងរដ្ឋ Chiapas ភាគខាងត្បូង។
កាលពីដើមខែសីហា មនុស្សយ៉ាងហោចណាស់ ១៨ នាក់បានស្លាប់ និង ២៣ នាក់បានរងរបួស បន្ទាប់ពីរថយន្តក្រុងដឹកអ្នកដំណើរក្នុងស្រុក និងជនចំណាកស្រុកមកពីប្រទេសមួយចំនួនដូចជា ឥណ្ឌា សាធារណរដ្ឋដូមីនីកែន និងប្រទេសអាហ្វ្រិកមួយចំនួនបានធ្លាក់ចូលទៅក្នុងជ្រោះក្នុងរដ្ឋ Nayarit ។
ហើយនៅក្នុងខែធ្នូ ឆ្នាំ ២០២១ ជនចំណាកស្រុកអាម៉េរិកកណ្តាលចំនួន ៥៦ នាក់ភាគច្រើនត្រូវបានសម្លាប់ និងរាប់សិបនាក់ផ្សេងទៀតរងរបួស នៅពេលដែលឡានដឹកទំនិញរបស់អ្នករត់ពន្ធមនុស្សដែលផ្ទុកមនុស្សប្រហែល ១៦០ នាក់បានក្រឡាប់នៅតំបន់ Chiapas ។រដ្ឋាភិបាលម៉ិកស៊ិកបានទទួលស្គាល់ថា មានចំនួនជនចំណាកស្រុកដ៏ច្រើនលើសលុបឆ្លងកាត់ទឹកដីរបស់ខ្លួន ដែលភាគច្រើនមកពីអាម៉េរិកកណ្តាល វេណេហ្ស៊ុយអេឡា គុយបា និងហៃទី។
អាជ្ញាធរម៉ិកស៊ិកបាននិយាយថា ពួកគេបានឃុំខ្លួនជនចំណាកស្រុកជាង ១៨៩,០០០ នាក់កាលពីខែមុន ខណៈពេលដែលការល្បាតតាមព្រំដែនរបស់សហរដ្ឋអាម៉េរិកបានរាយការណ៍ពីការចាប់ខ្លួនចំនួន ១.៨ លាននាក់នៅចន្លោះខែតុលា ឆ្នាំ ២០២២ ដល់ខែសីហា ឆ្នាំ ២០២៣ ។ មន្ត្រីជាន់ខ្ពស់របស់សហរដ្ឋអាម៉េរិក និងម៉ិកស៊ិកបានសន្យាកាលពីថ្ងៃព្រហស្បតិ៍ថានឹងបង្កើនកិច្ចខិតខំប្រឹងប្រែងរបស់ពួកគេឡើងវិញដើម្បីដោះស្រាយការធ្វើចំណាកស្រុកតាមរយៈវិធានការដូចជាការធ្វើទំនើបកម្មសន្តិសុខតាមព្រំដែន ការបង្កើនមធ្យោបាយផ្លូវច្បាប់ និងការដោះស្រាយបញ្ហាឫសគល់ផ្សេងៗ៕
