ឆ្នាំ២០២៧ ថៃគ្រោងនឹងធ្វើឲ្យប្រទេសខ្លួនក្លាយជាប្រទេសមានចំណូលខ្ពស់

ថៃ៖លោក ស្រេតថា ថាវីស៊ីន នាយករដ្ឋមន្ត្រីថៃថ្មី មានប្រសាសន៍ថា រដ្ឋាភិបាលនឹងប្រែក្លាយប្រទេសថៃ ទៅជាប្រទេសដែលមានចំណូលខ្ពស់ក្នុងរយៈពេល៤ឆ្នាំខាងមុខ។ លោកបានមានប្រសាសន៍ថា ក្នុងរយៈពេល ៤ ឆ្នាំ សេដ្ឋកិច្ចថៃនឹងកើនឡើងជាមធ្យម ៥% ក្នុងមួយឆ្នាំ ហើយប្រាក់ឈ្នួលប្រចាំថ្ងៃអប្បបរមានឹងមានចំនួន ៦០០បាត (១៦.១៥ដុល្លារ)ក្នុងមួយថ្ងៃនៅឆ្នាំ ២០២៧ ។

បើតាមលោក ស្រេថា នៅក្នុងជំហានដំបូង ប្រាក់ឈ្នួលអប្បបរមានឹងត្រូវបានដំឡើងដល់ ៤០០ បាតក្នុងមួយថ្ងៃ ហើយប្រាក់ខែសម្រាប់និស្សិតបញ្ចប់ការសិក្សាថ្នាក់បរិញ្ញាបត្រនឹងមានចំនួន ២៥,០០០ បាត (៦៧២.៣៨ដុល្លារ) ក្នុងមួយខែ។ នេះនឹងជាផ្នែកនៃការផ្លាស់ប្តូរឆ្ពោះទៅរកការក្លាយជាប្រទេសដែលមានប្រាក់ចំណូលខ្ពស់ក្នុងប្រទេសថៃក្នុងឆ្នាំ ២០២៧។

លោក ស្រេតថា បានអះអាងថា វិធានការសេដ្ឋកិច្ចរបស់រដ្ឋាភិបាលថៃ ជាពិសេសគម្រោងផ្តល់ប្រាក់ឌីជីថល ១០,០០០ បាត នឹងជំរុញទាំងតម្រូវការ និងការផ្គត់ផ្គង់ ដែលនឹងនាំឱ្យប្រាក់ចរាចរក្នុងសេដ្ឋកិច្ច និងរួមចំណែកដល់កំណើន GDP ដល់ប្រជាពលរដ្ឋថៃ៕