សេអ៊ូល៖ កូរ៉េខាងត្បូងបានរៀបចំពិធីដង្ហែរក្បួនយោធាទ្រង់ទ្រាយធំលើកដំបូងរបស់ខ្លួនក្នុងរយៈពេលមួយទសវត្សរ៍នៅថ្ងៃអង្គារនេះជាមួយនឹងសព្វាវុធទំនើបៗជាច្រើនរួមទាំងមីស៊ីលផ្លោង ការវាយប្រហារសត្រូវជាច្រើនប្រភេទផ្សេងទៀត ព្យុហយាត្រានេះធ្វើឡើងចំពេលភាពតានតឹងជាមួយកូរ៉េខាងជើងកំពុងតែស្ថិតក្នុងបន្ទាត់ប្រកាសអាសន្ន។
ព្រឹត្តិការណ៍ពេញមួយថ្ងៃនៅទីក្រុងសេអ៊ូលនឹងមានទាហានរាប់ពាន់នាក់ និងរថក្រោះផលិតក្នុងស្រុករបស់កូរ៉េខាងត្បូង និងកាំភ្លើងធំ ព្រមទាំងយន្តហោះវាយប្រហារ និងយន្តហោះគ្មានមនុស្សបើក ដែលចូលរួមដោយទាហានអាម៉េរិក ៣០០ នាក់ក្នុងចំណោមទាហានអាមេរិក ២៨,៥០០ នាក់ដែលមានមូលដ្ឋាននៅក្នុងប្រទេសកូរ៉េខាងត្បូង។
កូរ៉េខាងត្បូងបានធ្វើព្យុហយាត្រាតាមដងផ្លូវយោធាលើកចុងក្រោយក្នុងឆ្នាំ ២០១៣។ព្រឹត្តិការណ៍នេះកើតឡើងនៅពេលដែលប្រធានាធិបតីកូរ៉េខាងត្បូងលោក Yoon Suk Yeol បានប្រកាន់ជំហរមិនច្បាស់លាស់លើកូរ៉េខាងជើង ដោយការបង្ហាញអាវុធ និងសមយុទ្ធយោធាជាមូលដ្ឋានគ្រឹះនៃយុទ្ធសាស្ត្ររបស់លោកដើម្បីទប់ទល់នឹងកម្មវិធីនុយក្លេអ៊ែរ និងមីស៊ីលដែលកំពុងវិវត្តរបស់កូរ៉េខាងជើង។
លោក Yoon បានសន្យាថានឹងមានការឆ្លើយតបយ៉ាងរហ័ស និងលើសលប់ប្រឆាំងនឹងការឈ្លានពានណាមួយដោយទីក្រុងព្យុងយ៉ាង ហើយបានពង្រឹងយ៉ាងសកម្មនូវសម្ព័ន្ធភាពយោធាជាមួយទីក្រុងវ៉ាស៊ីនតោន និងតូក្យូ ចាប់តាំងពីចូលកាន់តំណែងកាលពីឆ្នាំមុន។ក្បួនព្យុហយាត្រានៅថ្ងៃអង្គារនេះនឹងចាប់ផ្តើមនៅឯមូលដ្ឋានទ័ពអាកាសក្នុងទីក្រុង Seongnam ជាយក្រុងសេអ៊ូល ដែលនឹងដាក់តាំងបង្ហាញជាសាធារណៈនូវកាំមីស៊ីល Hyunmoo ឧបករណ៍ស្ទាក់ចាប់មីស៊ីល L-SAM យន្តហោះ F-35 និងយន្តហោះចម្បាំងដែលអភិវឌ្ឍក្នុងស្រុកដំបូងបង្អស់របស់ប្រទេសកូរ៉េខាត្បូងគឺ KF-21 ។
Hyunmoo គឺជាមីស៊ីលចុងក្រោយបង្អស់របស់កូរ៉េខាងត្បូង ដែលអ្នកវិភាគចាត់ទុកថា ជាផ្នែកសំខាន់នៃផែនការរបស់ទីក្រុងសេអ៊ូលសម្រាប់វាយប្រហារកូរ៉េខាងជើងប្រសិនបានជម្លោះអាចនឹងកើតមានឡើង ព្រឹត្តិការណ៍នេះក៏នឹងបង្ហាញពីការហោះហើររួមគ្នាដោយយន្តហោះយោធាកូរ៉េខាងត្បូង និងសហរដ្ឋអាម៉េរិក ដើម្បីបង្ហាញពីឥរិយាបថការពាររួមបញ្ចូលគ្នា "ធ្វើឱ្យប្រសើរឡើង" ។
គួរបញ្ជាក់ថាក្បួនព្យុហយាត្រាធ្វើឡើងមួយសប្តាហ៍បន្ទាប់ពីមេដឹកនាំកូរ៉េខាងជើងលោក គីម ជុងអ៊ុន ត្រឡប់ពីដំណើរទៅកាន់ប្រទេសរុស្ស៊ី ក្នុងអំឡុងពេលដែលលោក និងប្រធានាធិបតីរុស្ស៊ីលោក វ្ល៉ាឌីមៀ ពូទីន បានយល់ព្រមជំរុញកិច្ចសហប្រតិបត្តិការយោធា៕
