វ៉ាស៊ីនតោន៖ សហរដ្ឋអាម៉េរិកបានព្រមានឲ្យកូរ៉េខាងជើងទទួលរងការខុសត្រូវទាំងស្រុងប្រសិនបើផ្គត់ផ្គង់សព្វាវុធដល់រុស្ស៊ី។ការព្រមានរបស់អាម៉េរិកធ្វើឡើងបន្ទាប់ពីកូរ៉េខាងជើង និងរុស្សីកំពុងធ្វើ ការចរចាអាវុធរវាងប្រទេសពីរកំពុងដំណើរការទៅមុខយ៉ាងសកម្ម ស្របពេលដែលមេដឹកនាំកូរ៉េខាងជើងគ្រោងនឹងធ្វើដំណើរទស្សនកិច្ចទៅកាន់ប្រទេសរុស្សីនាពេលដ៏ឆាប់ខាងមុខនេះ។
ទីប្រឹក្សាសន្តិសុខជាតិរបស់សហរដ្ឋអាម៉េរិកលោក Jake Sullivan បានចាត់ទុកការផ្តល់សព្វាវុធដល់រុស្ស៊ីរបស់កូរ៉េខាងជើងមិនបានជួយកាត់បន្ថយវិបត្តិសង្រ្គាមរវាងរុស្សី-អ៊ុយក្រែននោះទេ ផ្ទុយទៅវិញការផ្តល់ជំនួយបែបនេះមានតែចាក់សាំងបន្ថែមឲ្យសង្រ្គាមរវាងប្រទេសទាំងពីរនេះអូសបន្លាយកាន់តែយូរអង្វែងបន្ថែមទៀត។
ចំណែកវិមានក្រឹមឡាំងបានថ្លែងឲ្យដឹងថា ខ្លួនមិនមានអ្វីត្រូវនិយាយទេអំពីសេចក្តីថ្លែងការណ៍របស់មន្ត្រីអាម៉េរិកដែលថា លោក គីម គ្រោងនឹងធ្វើដំណើរទៅកាន់ប្រទេសរុស្ស៊ីក្នុងខែនេះ ដើម្បីជួបជាមួយប្រធានាធិបតី វ្ល៉ាឌីមៀ ពូទីន និងពិភាក្សាអំពីការផ្គត់ផ្គង់អាវុធដល់ទីក្រុងមូស្គូនោះទេ។
កាលពីថ្ងៃច័ន្ទ អ្នកនាំពាក្យក្រុមប្រឹក្សាសន្តិសុខជាតិអាម៉េរិក លោក Adrienne Watson បាននិយាយថា លោក Kim និងលោក Putin អាចគ្រោងនឹងជួបគ្នាក្នុងខែនេះ លោក Kim គ្រោងនឹងធ្វើដំណើរទៅកាន់ប្រទេសរុស្ស៊ី ឱ្យបានឆាប់នៅសប្តាហ៍ក្រោយ ដើម្បីជួបលោកពូទីន៕
