បាងកក៖ អតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រា ដែលកំពុងជាប់ពន្ធនាគារបានស្នើសុំការលើកលែងទោសពីព្រះមហាក្សត្រ បន្ទាប់ពីបែកធ្លាយពាក្យចចាមអារ៉ាមអំពីកិច្ចព្រមព្រៀងមួយសម្រាប់ការបន្ធូរបន្ថយទោសរូបលោកក្រោយត្រឡប់ចូលមកប្រទេសថៃវិញ។មហាសេដ្ឋីថៃអាយុ ៧៤ ឆ្នាំរូបនេះដែលត្រូវបានជាប់ឆ្នោតជានាយករដ្ឋមន្ត្រីពីរដងហើយត្រូវបានបណ្តេញចេញពីរដ្ឋប្រហារយោធាឆ្នាំ ២០០៦ ត្រូវបានបញ្ជូនទៅពន្ធនាគារកាលពីសប្តាហ៍មុនភ្លាមៗបន្ទាប់ពីបានវិលត្រឡប់មកព្រះរាជាណាចក្រថៃវិញពីការនិរទេសខ្លួនឯងអស់រយៈពេល ១៥ ឆ្នាំ។
រដ្ឋមន្ត្រីក្រសួងយុត្តិធម៌ចាំផ្ទះ លោក Wissanu Krea-ngam បាននិយាយថា លោកថាក់ស៊ីនបានស្នើសុំការលើកលែងទោសពីពន្ធនាគាររយៈពេលប្រាំបីឆ្នាំដែលរូបលោកត្រូវបានតុលាការកាត់ទោសពីបទពុករលួយ និងការរំលោភបំពានអំណាច។ នៅពេលសួរថា តើដំណើរការនឹងត្រូវប្រើពេលប៉ុន្មាននោះ លោក Wissanu Krea-ngam បានមានប្រសាសន៍ថា ៖ «វាអាស្រ័យលើព្រះមហាក្សត្រ នីតិវិធីពីរដ្ឋាភិបាល រយៈពេលនៃការពិចារណារបស់ព្រះមហាក្សត្រ»។
តាមច្បាប់ថៃ អ្នកទោសអាចដាក់ពាក្យសុំលើកលែងទោសដែលត្រូវបានអនុម័តពីរដ្ឋមន្ត្រីក្រសួងយុត្តិធម៌ តាមរយៈនាយករដ្ឋមន្ត្រីទៅកាន់ក្រុមប្រឹក្សាឯកជន មុនពេលចូលគាល់ព្រះមហាក្សត្រ Maha Vajiralongkorn។មន្ត្រីនិយាយថា ដំណើរការនេះត្រូវចំណាយពេលពីមួយទៅពីរខែ ប្រសិនបើឯកសារទាំងអស់បានរៀបចំរួលរាល់។ នៅពេលចុះចតនៅទីក្រុងបាងកកកាលពីសប្តាហ៍មុន សកម្មភាពសាធារណៈលើកដំបូងរបស់លោកថាក់ស៊ីន គឺការក្រាបថ្វាយបង្គំនៅចំពោះមុខរូបព្រះមហាក្សត្រនៅអាកាសយានដ្ឋានថៃ៕
