ព្យុងយ៉ាង៖ ប្រព័ន្ធផ្សព្វផ្សាយរដ្ឋរបស់កូរ៉េខាងជើងរឺហៅកាត់ថា KCNA បានរាយការណ៍នាថ្ងៃព្រហស្បតិ៍ (១០ សីហា) ថា មេដឹកនាំកូរ៉េខាងជើង លោក គីម ជុងអ៊ុន បានដកតំណែងឧត្តមសេនីយកំពូលរបស់យោធាចេញ ហើយបានអំពាវនាវឱ្យមានការរៀបចំបន្ថែមទៀតសម្រាប់លទ្ធភាពនៃសង្គ្រាម ការជំរុញការផលិតអាវុធ និងការពង្រីកសមយុទ្ធយោធា។ មេដឹកនាំកូរ៉េខាងជើងរូប បានធ្វើអត្ថាធិប្បាយនៅក្នុងកិច្ចប្រជុំនៃគណៈកម្មាការយោធាមជ្ឈិម ដែលបានពិភាក្សាអំពីផែនការសម្រាប់វិធានការទប់ទល់នឹងសត្រូវរបស់កូរ៉េខាងជើង ចំពេលដែលភាពតានតឹងក្នុងតំបន់ឧបទ្វីបកូរ៉េកំពុងតែស្ថិតចូលបន្ទាត់ប្រកាសអាសន្ន។
ប្រភពព័ត៌មានកូរ៉េខាងជើងដដែលបានលើកឡើងថា ឧត្តមសេនីយកំពូលរបស់ប្រទេសកូរ៉េខាងជើង ដែលជាប្រធានអគ្គសេនាធិការ Pak Su Il ត្រូវបាន "បណ្តេញចេញ" បន្ទាប់ពីបានបម្រើការងារបាន៥ខែ ហេតុផលនៃការបណ្តេញឧត្តមសេនីយកំពូលរូបនេះចេញពីតំណែងកូរ៉េខាងជើងមិនបានបញ្ជាក់ព័ត៌មានលម្អិតនោះទេ។
ឧត្តមសេនីយកំពូលរូបនេះ ត្រូវបានជំនួសដោយឧត្តមសេនីយ៍ Ri Yong Gil ដែលពីមុនធ្លាប់ធ្វើជារដ្ឋមន្ត្រីការពារជាតិរបស់ប្រទេសកូរ៉េខាងជើង ក៏ដូចជាមេបញ្ជាការកំពូលនៃកងទ័ពរបស់ខ្លួន។ លោក Ri ក៏ធ្លាប់ធ្វើជាមេទ័ពដែរ ឧត្តមសេនីយកំពូលរូបនេះត្រូវបានគេជឿជាក់ថាជាមនុស្សដែលពូកែរៀបចំផែនការសង្រ្គាម និងជាមនុស្សជិតស្និតម្នាក់ជាមួយនិងមេដឹកកូរ៉េខាងជើងគឺលោក គឹមជុងអ៊ុន។
កាលពីសប្តាហ៍មុនមេដឹកនាំកូរ៉េខាងជើងរូបនេះ បានទៅទស្សនារោងចក្រសព្វាវុធ ដែលលោកបានអំពាវនាវឲ្យផលិតមីស៊ីល កាំភ្លើងធំ និងអាវុធផ្សេងទៀតដើម្បីប្រើប្រាស់នាពេលខាងមុខ។លោក Kim ក៏បានអំពាវនាវឱ្យយោធាធ្វើសមយុទ្ធជាមួយនឹងអាវុធ និងឧបករណ៍ចុងក្រោយបង្អស់របស់ប្រទេសកូរ៉េខាងជើង ដើម្បីរក្សាកងកម្លាំងរបស់ខ្លួនត្រៀមខ្លួនសម្រាប់ការប្រយុទ្ធ។ កូរ៉េខាងជើងគ្រោងនឹងធ្វើព្យុហយាត្រារបស់កងជីវពលនៅថ្ងៃទី ៩ ខែកញ្ញា ដើម្បីប្រារព្ធខួបលើកទី ៧៥ នៃទិវាមូលនិធិនៃសាធារណរដ្ឋ។ កូរ៉េខាងជើងមានក្រុមប៉ារ៉ាមួយចំនួនដែលខ្លួនប្រើដើម្បីពង្រឹងកម្លាំងយោធារបស់ខ្លួន។
សហរដ្ឋអាម៉េរិកបានចោទប្រកាន់កូរ៉េខាងជើងថាបានផ្តល់អាវុធដល់រុស្ស៊ីសម្រាប់សង្គ្រាមរុស្សី-អ៊ុយក្រែន រួមទាំងកាំភ្លើងធំ គ្រាប់រ៉ុក្កែត និងមីស៊ីល ខណៈដែលរុស្ស៊ី និងកូរ៉េខាងជើងបានបដិសេធការអះអាងទាំងនោះ។ សហរដ្ឋអាម៉េរិក និងកូរ៉េខាងត្បូងគ្រោងនឹងធ្វើសមយុទ្ធយោធារវាងថ្ងៃទី ២១ និង ២៤ ខែសីហានេះ ដែលកូរ៉េខាងជើងបានចាត់ទុកថាជាការគំរាមកំហែងដល់សន្តិសុខរបស់ខ្លួន៕
