របបយោធាមីយ៉ាន់ម៉ា លើកលែងទោសមួយចំនួនដល់លោកស្រី អ៊ុងសានស៊ូជី

មីយ៉ាន់៖ របបម៉ាយោធាមីយ៉ាន់ម៉ាដែលកំពុងកាន់អំណាច បានផ្តល់ការលើកលែងទោសមួយចំនួនដល់មេដឹកនាំដែលត្រូវបានទម្លាក់លោកស្រី អ៊ុងសានស៊ូជី ដោយលើកលែងទោស ក្នុងបទល្មើសចំនួន ៥ ក្នុងចំណោម ១៩ បទល្មើសដែលលោកស្រីត្រូវបានកាត់ទោស និងជាប់គុកសរុបចំនួន ៣៣ ឆ្នាំបន្ទាប់ពីរដ្ឋប្រហារកាលពី ២ ឆ្នាំមុន។ ការលើកលែងទោសដែលត្រូវបានប្រកាសនៅលើប្រព័ន្ធផ្សព្វផ្សាយរដ្ឋកាលពីថ្ងៃអង្គារគឺជាផ្នែកមួយនៃការលើកលែងទោសដែលបានផ្តល់ឱ្យអ្នកទោសជាង ៧,០០០ នាក់ដើម្បីប្រារព្ធពិធីបុណ្យដ៏សំខាន់ក្នុងប្រទេសមីយ៉ាន់ម៉ា។

អតីតមេដឹកនាំមីយ៉ាន់ម៉ារូបនេះត្រូវបានគេរាយការណ៍ថាបានផ្លាស់ប្តូរ ពីពន្ធនាគារទៅការឃុំខ្លួនក្នុងផ្ទះក្នុងរដ្ឋធានី Naypyidaw ចាប់តាំពីត្រូវបានឃុំខ្លួនចាប់តាំងពីយោធាបានផ្តួលរំលំរដ្ឋាភិបាលរបស់លោកស្រី និងបានដណ្តើមអំណាចនៅក្នុងរដ្ឋប្រហារក្នុងខែកុម្ភៈឆ្នាំ ២០២១។លោកស្រីកំពុងប្តឹងឧទ្ធរណ៍ចំពោះការផ្ដន្ទាទោសចំពោះបទល្មើសទាំង ១៩ ដែលរាប់ចាប់ពីបទញុះញង់ និងការបន្លំសន្លឹកឆ្នោត រហូតដល់អំពើពុករលួយ លោកស្រីក៏បានបដិសេធរាល់ការចោទប្រកាន់។ ប្រភពព័ត៌មានមួយបានប្រាប់ទីភ្នាក់ងារព័ត៌មាន Reuters ថា ទោះបីជាមានការលើកលែងទោសក៏ដោយ ក៏លោកស្រី អ៊ុងសាន ស៊ូជី នឹងនៅជាប់ឃុំឃាំងដដែល។

លោកស្រី អ៊ុងសានស៊ូជី គឺជាកូនស្រីរបស់វីរៈបុរសឯករាជ្យរបស់មីយ៉ាន់ម៉ា លោកស្រីត្រូវបានចាប់ខ្លួនជាលើកដំបូងនៅក្នុងឆ្នាំ ១៩៨៩ បន្ទាប់ពីមានការតវ៉ាដ៏ធំប្រឆាំងនឹងការគ្រប់គ្រងដោយយោធាជាច្រើនទសវត្សរ៍។ ក្នុងឆ្នាំ ១៩៩១ លោកស្រីបានឈ្នះរង្វាន់ណូបែលសន្តិភាពសម្រាប់ការធ្វើយុទ្ធនាការដើម្បីលទ្ធិប្រជាធិបតេយ្យ ប៉ុន្តែត្រូវបានដោះលែងទាំងស្រុងពីការឃុំខ្លួនក្នុងផ្ទះក្នុងឆ្នាំ ២០១០។ គណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រីបានឈ្នះការបោះឆ្នោតឆ្នាំ ២០១៥ ហើយបានបន្តឈ្នះការបោះឆ្នោតបន្ទាប់ក្នុងខែវិច្ឆិកា ឆ្នាំ ២០២០ ដោយភ្លូកទឹកភ្លូកដី ប៉ុន្តែយោធាបានចោទប្រកាន់ពីការក្លែងបន្លំសន្លឹកឆ្នោត ហើយក៏បានធ្វើរដ្ឋប្រហារទម្លាក់លោកស្រីចេញពីអំណាច។ យោងតាមក្រុមឃ្លាំមើលក្នុងស្រុកបានឲ្យដឹងថា មនុស្សជាង ៣៨០០ នាក់ត្រូវបានសម្លាប់ក្នុងការបង្ក្រាប។ ការប្រយុទ្ធគ្នារវាងកងជីវពលយោធា និងជនស៊ីវិលក៏បានធ្វើឲ្យមនុស្សជាង ១,៦ លាននាក់ភៀសខ្លួននៅទូទាំងប្រទេស៕