ចិន៖រដ្ឋាភិបាលនៃប្រទេសចិន នៅថ្ងៃទី ២៥ កក្កដានេះ បានសម្រេចដកតំណែងលោក Qin Gang ចេញពីមុខតំណែងរដ្ឋមន្ត្រីការបរទេសចិន ហើយជំនួសមកវិញដោយលោក វ៉ាង យី អតីតរដ្ឋមន្ត្រីចាស់វិញ។ការសម្រេចនេះ ធ្វើឡើងកិច្ចប្រជុំលើកទី៤ នៃគណៈកម្មាធិការអចិន្ត្រៃយ៍នៃសភាប្រជាជនជាតិលើកទី១៤នៃប្រទេសចិន បានប្រារព្ធឡើងនៅវិមានប្រជាជននៅទីក្រុងប៉េកាំង។
លោក Qin Gang ជាអតីតអគ្គរដ្ឋទូតចិនប្រចាំនៅអាម៉េរិក ហើយកាលពីខែធ្នូឆ្នាំ២០២២ លោកត្រូវបានរដ្ឋាភិបាលនៃប្រទេសចិន ប្រកាសតែងតាំងជាជារដ្ឋមន្រ្តីការបរទេសចិនជំនួសលោក វ៉ាង យី ។ក្រោយកាន់តំណែងបានជាង៧ខែ លោក Qin Gang ត្រូវបានដកចេញពីមុខតំណែងរដ្ឋមន្ត្រីការបរទេសចិន ដែលតែងតាំង វ៉ាង យី សារជាថ្មី។នេះបើយោងតាមការប្រកាសរបស់គណៈកម្មាធិការអចិន្ត្រៃយ៍នៃសភាប្រជាជនជាតិលើកទី១៤នៃប្រទេសចិន ចុះផ្សាយដោយទីភ្នាក់ងារសារព័ត៌មានស៊ីនហួរ។
មិនមានហេតុផលលម្អិតនៃការប្រកាសដកតំណែងនោះទេ។ប៉ុន្តែមុនដកតំណែងលោក Qin Gang បានបាត់មុខមួយរយៈ និងមិនបានទៅចូលរួមកិច្ចប្រជុំសំខាន់មួយចំនួនរួមទាំងកិច្ចប្រជុំ រដ្ឋមន្ត្រីការបរទេសសមាគមប្រជាជាតិអាស៊ីអាគ្នេយ៍ ឬអាស៊ាននិងចិននៅប្រទេសឥណ្ឌូណេស៊ីផងដែរ។
អ្នកនាំពាក្យក្រសួងការបរទេសចិន លោក Wang Wenbin ធ្លាប់បានអះអាងថា លោក Qin Gang មិនអាចចូលរួមជំនួបរដ្ឋមន្ត្រីការបរទេសអាស៊ានទេ ពីព្រោះតែមូលហេតុសុខភាព។
គួរបញ្ជាក់ថា លោក Qin អាយុ៥៧ឆ្នាំបានទទួលតំណែងពីលោក Wang ជារដ្ឋមន្ត្រីការបរទេសនៅខែធ្នូ ឆ្នាំ២០២២ ហើយត្រូវបានគេឃើញជាសាធារណៈលើកចុងក្រោយកាលពីថ្ងៃទី២៥ ខែមិថុនា នៅក្នុងទីក្រុងប៉េកាំង បន្ទាប់ជំនួបជាមួយពួកមន្ត្រីមកពីប្រទេសស្រីលង្កា រុស្ស៊ី និងវៀតណាម។
លោក វ៉ាង យី ជាប្រធានគោលនយោបាយការបរទេសរបស់ប្រទេសចិន និង ជាអតីតរដ្ឋមន្ត្រីការបរទេស និងជាប្រធានគោលនយោបាយបរទេសរបស់រដ្ឋាភិបាលចិន ត្រូវបានប្រកាសតែងតាំងជំនួសលោក Qin Gang វិញ៕
