គណបក្សភ្លើងទៀនចាត់ទុក«អ្នកនាំឱ្យគេគូសសន្លឹកឆ្នោតចោល»ជាទង្វើរខុសច្បាប់

ភ្នំពេញ៖ គណបក្សភ្លើងទៀន នៅថ្ងៃទី ១៩ កក្កដានេះ បានចេញនូវសេចក្តីថ្លែងការណ៍មួយប្រកាសបដិសេធ មិនជាប់ពាក់ព័ន្ធ និង មិនទទួលខុសត្រូវចំពោះទង្វើរបស់បុគ្គលទាំងឡាយណាដែលធ្វើសកម្មភាពរារាំងប្រជាពលរដ្ឋមិនឱ្យទៅចូលរួមបោះឆ្នោតដែលប្រព្រឹត្តិទៅនៅថ្ងៃទី ២៣ កក្កដាខាងមុខនេះ។គណបក្សនេះ បានចាត់ទុក«អ្នករារាំង»មិនឱ្យគេទៅបោះឆ្នោតជាទង្វើរខុសច្បាប់។

គណបក្សភ្លើងទៀនដែលគេស្គាល់ថា ជាគណបក្សបង្កើតឡើងដោយអតីតមេបក្សប្រឆាំងលោកសម រង្ស៊ី បានអះអាងថា មានបុគ្គលមួយចំនួន បានធ្វើសកម្មភាពអំពាវនាវដល់ប្រជាពលរដ្ឋខ្មែរកុំឱ្យទៅបោះឆ្នោត ឬគូសសន្លឹកឆ្នោតចោល នៅថ្ងៃបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹង ប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ដែលនេះគឺជាទង្វើរំលោភបំពានច្បាប់ ពិសេស ច្បាប់ស្តីពីការបោះឆ្នោត។

យោងតាមសេចក្តីថ្លែងការណ៍ គណបក្សភ្លើងទៀន បានប្រកាសបដិសេធមិនជាប់ពាក់ព័ន្ធ និង មិនទទួលខុសត្រូវចំពោះ ទង្វើរបស់បុគ្គលទាំងឡាយណា ដែលធ្វើសកម្មភាពប្រាសចាកពីស្មារតីនៃរដ្ឋធម្មនុញ្ញ និងច្បាប់ជាធរមាននានា នៃព្រះរាជាណាចក្រកម្ពុជាឡើយ។

បើតាមគណបក្សមួយនេះ យល់ថា បោះឆ្នោតជ្រើសតាំងតំណាងរាស្ត្រ នីតិកាលទី៧ ប្រជាពលរដ្ឋខ្មែរ មានសិទ្ធិពេញលេញស្របតាមច្បាប់ ក្នុងការធ្វើសេចក្តីសម្រេចចិត្ត តាមសតិសម្បជញ្ញៈពិតប្រាកដរបស់ ខ្លួនក្នុងការចូលរួម ឬមិនចូលរួមក្នុងការបោះឆ្នោតជ្រើសរើសតំណាងស្របតាមឆន្ទៈរបស់ខ្លួន ដោយមិនត្រូវ ស្ថិតក្រោមការកៀបសង្កត់ ការបង្ខិតបង្ខំ ការគំរាមកំហែង ការបង្គាប់បញ្ហា ឬការញុះញង់ ពីសំណាក់បុគ្គល ឬគណបក្សនយោបាយណាមួយឡើយ។

គួរបញ្ជាក់ថា ការបោះឆ្នោតនៅនីតិកាលទី៧ មានគណបក្សនយោបាយចំនួន១៨ ចូលរួមប្រកួតប្រជែង។ ក្នុងនោះមានជាអាទិ៍ គណបក្សប្រជាធិបតេយ្យមូលដ្ឋាន គណបក្សខ្មែររួបរួមជាតិ គណបក្សហ្វ៊ុនស៊ិនប៉ិច គណបក្សយុវជនកម្ពុជា និង គណបក្សប្រជាជនកម្ពុជា ដែលជាគណបក្សកាន់អំណាច។ ល។

គណបក្សភ្លើងទៀន ដែលគេយល់ថា ជាគណបក្សប្រឆាំង ត្រូវបានជ្រុះចេញពីការបោះឆ្នោតសម្រាប់លើកនេះ ដោយសារបញ្ហាកង្វះឯកសារ៕