ថៃ៖ តុលាការធម្មនុញ្ញថៃ នៅថ្ងៃទី ១៩ កក្កដានេះ បានប្រកាសសម្រេច«ព្យួរឈ្មោះ»លោកភិថា ពីសមាជិកសភាក្នុងបញ្ជីគណបក្ស រហូតដល់តុលាការចេញសាលក្រម ក្នុងករណីដែលគណៈកម្មាធិការបោះឆ្នោត ( Election Committe) បានចោទប្រកាន់ ភិថា ថាមិនមានលក្ខណៈសម្បត្តិគ្រប់គ្រាន់ក្នុងការប្រកួតប្រជែងការបោះឆ្នោតថ្ងៃទី ១៤ ខែឧសភា ពីបទកាន់កាប់ភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយ iTV Plc ។
ការផ្អាកនេះបានកើតឡើងនៅពេលដែលសភា និងព្រឹទ្ធសភាគ្រោងនឹងបោះឆ្នោតជ្រើសរើសនាយករដ្ឋមន្ត្រីបន្ទាប់នៅក្នុងការបោះឆ្នោតជុំទីពីរនៅថ្ងៃពុធ។ សម្ព័ន្ធគណបក្សចំនួនប្រាំបីបានបញ្ជាក់ជាថ្មីអំពីផែនការរបស់ខ្លួនក្នុងការដាក់ឈ្មោះ ភិថា ជាបេក្ខភាពនាយករដ្ឋមន្ត្រីរបស់ខ្លួនឡើងវិញ បើទោះបីជាលោកមិនបានទទួលបានសំឡេងគ្រប់គ្រាន់ក្នុងការបោះឆ្នោតជុំទីមួយកាលពីថ្ងៃព្រហស្បតិ៍ក៏ដោយ។ការសម្រេចចិត្តព្យួរនេះបានរារាំងលោក ភិថា ពីការចូលសភាជាសមាជិកសភា ប៉ុន្តែលោកនៅតែអាចត្រូវបានគេតែងតាំងជាបេក្ខជននាយករដ្ឋមន្ត្រី និងចូលរួមសម័យប្រជុំបោះឆ្នោតលើបេក្ខភាពរបស់លោក។
កាលពីថ្ងៃពុធសប្តាហ៍មុន EC បានបោះឆ្នោតជាឯកច្ឆ័ន្ទដើម្បីប្រជុំអំពីមាត្រា ៨២ នៃរដ្ឋធម្មនុញ្ញដើម្បីសុំឱ្យតុលាការធម្មនុញ្ញលុបចោលឋានៈសមាជិកសភារបស់លោក ភិថា ក្រោមការសង្ស័យថាលោកបានកាន់កាប់ភាគហ៊ុនចំនួន ៤២,០០០ នៅក្នុងក្រុមហ៊ុន iTV Plc នៅពេលដែលលោកបានដាក់ពាក្យកាលពីខែមេសាដើម្បីធ្វើជាបេក្ខជនសម្រាប់ការបោះឆ្នោតថ្ងៃទី ១៤ ខែឧសភា។
តុលាការបានប្រកាសថា ចៅក្រមបានបោះឆ្នោតជាឯកច្ឆ័ន្ទថា ញត្តិរបស់ EC ត្រូវបានគាំទ្រដោយភស្តុតាងដែលថាចុងចោទមិនមានលក្ខណៈសម្បត្តិគ្រប់គ្រាន់ក្នុងការដាក់ពាក្យសុំធ្វើជាបេក្ខជនក្នុងការបោះឆ្នោត ហើយជាលទ្ធផលពួកគេបានទទួលយកញត្តិសម្រាប់ការពិនិត្យរបស់តុលាការ។លោក ភិថា មានពេល ១៥ ថ្ងៃដើម្បីផ្តល់សក្ខីកម្ម និងបញ្ជូនភស្តុតាងទៅតុលាការក្នុងការការពាររឿងក្តីរបស់លោក៕
