ប៉េកាំង៖ ប្រេសិតអាកាសធាតុអាម៉េរិក លោក ចន ឃែរី បានប្រាប់មន្ត្រីចិននៅថ្ងៃអង្គារនេះថា ការកើនឡើងកំដៅផែនដី បង្កការគំរាមកំហែងដល់មនុស្សជាតិទាំងអស់ និងទាមទារឱ្យមានកិច្ចសហប្រតិបត្តិការប្រភេទថ្មី រវាងប្រទេសចិន និងសហរដ្ឋអាម៉េរិក។ លោក ឃែរី បានអំពាវនាវឱ្យមាន "វិធានការបន្ទាន់" ដោយទីក្រុងប៉េកាំង និងទីក្រុងវ៉ាស៊ីនតោន ដើម្បីដោះស្រាយការគំរាមកំហែងនៃការប្រែប្រួលអាកាសធាតុ។
ថ្លែងនៅឯមហាសាលប្រជាជននៃទីក្រុងប៉េកាំងជាមួយនឹងអ្នកការទូតកំពូលរបស់ចិនលោក Wang Yi នាថ្ងៃអង្គារនេះ លោក ឃែរី បានគូសបញ្ជាក់អំពីតម្រូវការសម្រាប់ "ភាពជាអ្នកដឹកនាំសកល" លើបញ្ហានេះ។ ដំណើរទស្សនកិច្ចរបស់លោកទៅកាន់ប្រទេសចិនបានកើតឡើងនៅពេលដែលបញ្ហាអឌ្ឍគោលខាងជើងកំពុងតែប្រឈមជាមួយនឹងរលកកំដៅរដូវក្តៅ ដែលអ្នកវិទ្យាសាស្ត្របានចាត់ទុកថានេះគឺជាសញ្ញាបម្រែបម្រួលអាកាសធាតុមិនធ្លាប់មានពីមុនមក។
លោក ឃែរី បានប្រាប់លោក Wang ថា "អាកាសធាតុ ដូចដែលយើងដឹងហើយ គឺជាបញ្ហាសកល មិនមែនជាបញ្ហាទ្វេភាគីនោះទេវាជាការគំរាមកំហែងដល់មនុស្សជាតិទាំងអស់" លោកបានសង្កត់ធ្ងន់ថា"ក្តីសង្ឃឹមរបស់យើងនៅពេលនេះគឺថា នេះអាចជាការចាប់ផ្តើមនៃនិយមន័យថ្មីនៃកិច្ចសហប្រតិបត្តិការ និងសមត្ថភាពដើម្បីដោះស្រាយភាពខុសគ្នារវាងប្រទេសទាំងពីរ"។
លោក Wang បាននិយាយជាការឆ្លើយតបថា៖ «មានតម្រូវការសម្រាប់ទំនាក់ទំនងចិន-អាម៉េរិកដែលមានសុខភាពល្អ ស្ថិរភាព និងនិរន្តរភាព»។ លោកបានប្រាប់លោក ឃែរី ដែលជា "មិត្តចាស់" ថា "កិច្ចសហប្រតិបត្តិការលើការប្រែប្រួលអាកាសធាតុកំពុងរីកចម្រើនក្រោមអាកាសធាតុទាំងមូលនៃប្រទេសចិន និងសហរដ្ឋអាម៉េរិក ដូច្នេះយើងត្រូវការការគាំទ្ររួមគ្នាពីប្រជាជនចិន និងសហរដ្ឋអាម៉េរិក"៕
