.png?1741682398)
ភ្នំពេញ៖ សេដ្ឋកិច្ចកម្ពុជា ឆ្នាំ២០២៣ ត្រូវបានព្យាករថានឹងមានកំណើន ៥,៥% ជាមួយនឹងកម្រិតអតិផរណាទាបប្រមាណ២%។តែយ៉ាងណាអ្នកជំនាញណែនាំឱ្យ យកចិត្តទុកដាក់លើ«ហានិភ័យ»សក្តានុពលចម្បងៗមួយចំនួន គឺជម្លោះខាងក្រៅ និង បញ្ហាអចលទ្រព្យ។នេះបើយោងតាមតាម ធនាគារជាតិកម្ពុជា។
ធនាគារជាតិកម្ពុជា បានរៀបចំសិក្ខាសាលារយៈពេល២ថ្ងៃ ស្តីពី ការផ្សព្វផ្សាយរបាយការណ៍ស្ថានភាពស្ថិរភាពហិរញ្ញវត្ថុឆ្នាំ២០២២។ក្នុងសិក្ខាសាលានោះ ធនាគារជាតិកម្ពុជា នៅតែមានសុទិដ្ឋិនិយមថា សេដ្ឋកិច្ចកម្ពុជានៅតែរក្សាបានកំណើនល្អ តែត្រូវប្រឈមជាមួយហានិភ័យមួយចំនួន។
បើតាម ធនាគារជាតិកម្ពុជា«ហានិភ័យ»សក្តានុពលចម្បងៗមានប្រភពពីកត្តាខាងក្រៅ៖ ការអូសបន្លាយនៃភាពតានតឹងរវាងរុស្ស៊ី និងអ៊ុយក្រែន និង ការរឹតបន្តឹងនស្ថានភាពហិរញ្ញវត្ថុអន្តរជាតិ ដែលប៉ះពាល់ដល់ការរំពឹងទុកនៃការនាំចេញនិងការវិនិយោគចូលមកកម្ពុជា បញ្ហាដែលអូសបន្លាយក្នុងទីផ្សារអចលនទ្រព្យរបស់ប្រទេសចិន ដែលអាចបង្អាក់កំណើនវិនិយោគក្នុងវិស័យអចលនទ្រព្យនៅកម្ពុជា និង ការកើនឡើងអត្រាការប្រាក់ឥណទាន ដែលបណ្តាលមកពីការកើនឡើងអត្រាការប្រាក់លើទីផ្សារអន្តរជាតិ ដែលនាំឱ្យកំណើនឥណទានថយចុះ ហើយចំណាយលើការខ្ចីខ្ពស់ជាងមុនក៏អាចកាត់បន្ថយការវិនិយោគក្នុងស្រុកផងដែរ។
ចំណែក«ហានិភ័យខាងក្នុង»ដែលទាមទារយកចិត្តទុកដាក់ វិស័យអចលនទ្រព្យ។ ក្នុងរយៈពេលប្រមាណ ១ទសវត្សរ៍មុនពេលវិបត្តិកូវីដ-១៩ វិស័យអចលនទ្រព្យនៅកម្ពុជា មានការរីកចម្រើនយ៉ាងឆាប់រហ័ស។ ប៉ុន្តែការធ្លាក់ចុះសេដ្ឋកិច្ចពិភពលោក និងក្នុងស្រុកដោយសារវិបត្តិកូវីដ និង ការងើបឡើងក្នុងស្ថានភាពមិនប្រាកដប្រជាបានធ្វើឱ្យតម្រូវការក្នុងវិស័យនេះធ្លាក់ចុះជាលំដាប់។
សម្រាប់ ធនាគារជាតិកម្ពុជា ស្ថានភាពនេះទាមទារឱ្យមានការតាមដានយ៉ាងប្រុងប្រយ័ត្ន ជាពិសេសលើការផ្តល់ឥណទានទៅកាន់វិស័យអចលនទ្រព្យ ព្រមទាំងពង្រឹងកិច្ចសហការយ៉ាងជិតស្និតរវាងអាជ្ញាធរពាក់ព័ន្ធដើម្បីគ្រប់គ្រងហានិភ័យដែលអាចកើតមានឡើង និង ឥទ្ធិពលរាលដាលទៅកាន់វិស័យទៀត។
ប្រឈមបញ្ហានេះ ធនាគារជាតិនៃកម្ពុជា កំពុងអនុវត្តវិធានការចាកចេញពីវិបត្តិ ដោយការពង្រឹងក្របខណ្ឌបទប្បញ្ញត្តិឡើងវិញ ប្រកបដោយការប្រុងប្រយ័ត្ន ដើម្បីពង្រឹងភាពធន់របស់ប្រព័ន្ធធនាគារ ស្របពេលនឹងការជួយដល់វិស័យអាទិភាព ដូចជា សហគ្រាសធុនតូចនិងមធ្យម វិស័យកសិកម្ម អប់រំ ក្នុងដំណាក់កាលនៃការងើបឡើងរបស់សេដ្ឋកិច្ច។
ធនាគារជាតិកម្ពុជា សង្កត់ធ្ងន់ថា ការរក្សាស្ថិរភាពហិរញ្ញវត្ថុជាទីការងារអន្តរវិស័យ ដែលទាមទារឱ្យមានកិច្ចសហការ និង សម្របម្រួលទាំងពីអាជ្ញាធរ និង ភាគីពាក់ព័ន្ធនានាដោយសារប្រព័ន្ធហិរញ្ញវត្ថុមានភាពប្រទាក់ក្រឡាយ៉ាងជិតស្និទ្ធទាំងក្នុងចំណោមវិស័យហិរញ្ញវត្ថុ៕
