គម្រោងរេដបូកដែនជម្រកសត្វព្រៃកែវសីមា ចែកពូជគោដល់សមាជិកសហគមន៍នៅមណ្ឌលគិរី

មណ្ឌលគិរី៖ គម្រោងរេដបូកដែនជម្រកសត្វព្រៃកែវសីមា កាលពីនាថ្ងៃទី៣ កក្កដា បានសហការជាមួយ មន្ទីរបរិស្ថាន ខេត្តមណ្ឌលគិរី និងអាជ្ញាធរមូលដ្ធាន បានរៀបចំកម្មវិធីចែកពូជគោដល់សមាជិកសហគមន៍នៅភូមិខ្ទង់ ឃុំស្រែឈូក ស្រុកកែវសីមា ខេត្តមណ្ឌលគិរី។

កម្មវិធីចែកពូជគោនៅភូមិខ្ទង់នេះ ធ្វើឡើងក្នុងគោលបំណងលើកកម្ពស់ជីវភាពរស់នៅរបស់សហគមន៍អោយកាន់តែប្រសើរ កាត់បន្ថយសកម្មភាពចូលកាប់ឈើខុសច្បាប់ និងចូលរួមបន្តការពារធនធានធម្មជាតិអោយមាននិរន្តរភាព។ មេគោដែលសហគមន៍ទទួលបានមានចំនួន ១០ ក្បាលដែលជាពូជគោមេជំទង់ (ពូជកូនកាត់ចម្ហៀង) ដែលបានចាក់វ៉ាក់សាំងទំលាក់សត្វល្អិត វ៉ាក់សាំងការពារជំងឺសារទឺក និងវ៉ាក់សាំងការពារជំងឺអ៊ុចក្តាមរួចរាល់។

អ្នកស្រី សុភី ដែលជាអ្នកទទួលបានពូជគោមេមួយក្បាលក្នុងចំណោមសមាជិករេដបូកផ្សេងទៀត បាននិយាយថា លោកស្រីនឹងខិតខំចិញ្ចឹមមេគោនេះអោយបានល្អ អោយវាឆាប់ធំ ហើយសង្ឃឹមថានឹងឆាប់បានផលកូនគោ ដើម្បីបន្តបង្វិលមេគោនេះទៅអោយសមាជិកបន្តទៀត។ អ្នកស្រីបានបន្ថែមថា អ្នកស្រីនិងគ្រួសារនឹងបន្តចូលរួមការពារធនធានព្រៃឈើអោយមាននិរន្តរភាពដើម្បីអោយកូនចៅជំនាន់ក្រោយបានយល់ពីសារៈសំខាន់ និងអត្ថប្រយោជន៍របស់ធនធានទាំងអស់នេះ៕