រុស្សី៖ កងកម្លាំងប្រដាប់អាវុធរបស់រុស្ស៊ីបានរារាំងការប៉ុនប៉ងវាយលុករបស់កងកម្លាំងអ៊ុយក្រែនក្នុងទិសដៅជាច្រើន និងបានបំផ្លាញគោលដៅយោធានៃកងកម្លាំងបម្រុងរបស់អ៊ុយក្រែនជាច្រើនកន្លែងសំខាន់ៗ ខណៈដែលកងកម្លាំងអ៊ុយក្រែនបានបើកការវាយប្រហារតាមអាកាសឆ្ពោះទៅរកកងទ័ព និងគ្រឿងសព្វាវុធរុស្ស៊ី និងបានបាញ់ទម្លាក់ឧទ្ធម្ភាគចក្រ និងយន្តហោះគ្មានមនុស្សបើករបស់រុស្ស៊ីអស់ជាច្រើនគ្រឿង។ នេះបើយោងតាមការសង្ខេបព័ត៌មានផ្លូវការរបស់ប្រទេសទាំងពីរនៅលើថ្ងៃច័ន្ទម្សិលមិញនេះ។
ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយថា កងកម្លាំងរុស្ស៊ីបានប្រើប្រាស់អាវុធជាក់លាក់ដែលមានមូលដ្ឋានលើសមុទ្រដើម្បីវាយប្រហារកងកម្លាំងបម្រុងរបស់អ៊ុយក្រែន ទៅកាន់គោលដៅដែលបានកំណត់។
យោងតាមសេចក្តីថ្លែងការណ៍បានឱ្យដឹងថា កងកម្លាំងប្រដាប់អាវុធរបស់រុស្ស៊ីក៏បានវាយលុកការប៉ុនប៉ងវាយលុករបស់កងកម្លាំងអ៊ុយក្រែននៅតំបន់ Zaporozhye, Donetsk, Kupyansk, Krasny Liman និង Kherson ថែមទៀតផង ។
សេចក្តីថ្លែងការណ៍ក៏បានគូសបញ្ជាក់ផងដែលថា កងកម្លាំងរុស្ស៊ីបានវាយលុកគោលដៅយោធារបស់អ៊ុយក្រែន ដូចជារ៉ាដា ឃ្លាំងរំសេវ និងប៉ុស្តិ៍បញ្ជាការ ព្រមទាំងស្ទាក់ចាប់មីស៊ីលយុទ្ធសាស្ត្រ Tochka-U របស់អ៊ុយក្រែន និងយន្តហោះគ្មានមនុស្សបើកផងដែរ។
ចំណែកអគ្គសេនាធិការនៃកងកម្លាំងប្រដាប់អាវុធអ៊ុយក្រែនបាននិយាយថា នៅថ្ងៃដដែលនោះ កងកម្លាំងអ៊ុយក្រែនបានចូលរួមការប្រយុទ្ធយ៉ាងខ្លាំងក្លាជាមួយកងទ័ពរុស្ស៊ីក្នុងទិសដៅតំបន់ Krasny Liman, Bakhmut, Avdeyevka និង Marinka ហើយបានបើកការវាយប្រហារតាមអាកាសជាច្រើនដងប្រឆាំងនឹងរណសិរ្សរុស្ស៊ី៕
