វៀតណាមទាមទារតៃវ៉ាន់លុបចោលសមយុទ្ធបាញ់គ្រាប់ពិតនៅកោះ Spratlys

វៀតណាម៖ ក្រសួងការបរទេសវៀតណាមចាត់ទុកការធ្វើសមយុទ្ធបាញ់គ្រាប់ពិតនៅជិតកោះ Itu Aba តៃវ៉ាន់កំពុងធ្វើសកម្មភាពបំពានដោយផ្ទាល់លើអធិបតេយ្យភាពទឹកដីរបស់វៀតណាមលើប្រជុំកោះ Spratly ។ ការដែលតៃវ៉ាន់ធ្វើសមយុទ្ធបាញ់គ្រាប់ពិតនៅតំបន់សមុទ្រជុំវិញ Itu Aba ដែលជាផ្នែកមួយនៃប្រជុំកោះ Spratly របស់វៀតណាម គឺជាការរំលោភយ៉ាងធ្ងន់ធ្ងរលើអធិបតេយ្យភាពរបស់វៀតណាមហើយក៏ជាការ គំរាមកំហែងដល់សន្តិភាព ស្ថិរភាព សុវត្ថិភាព និងសន្តិសុខដែនសមុទ្រ ក៏ដូចជាការកើនឡើងនូវភាពតានតឹងរវាងប្រទេសទាំងពីរ។

អ្នកនាំពាក្យក្រសួងការបរទេសលោកស្រី Pham Thu Hang បានឲ្យដឹងថា“វៀតណាមជំទាស់យ៉ាងដាច់អហង្ការចំពោះទង្វើនេះ ហើយទាមទារឲ្យតៃវ៉ាន់លុបចោលសកម្មភាពខុសច្បាប់ដែលបានរៀបរាប់ខាងលើ ហើយកុំឲ្យមានការរំលោភស្រដៀងគ្នាម្តងទៀតនាពេលអនាគត”។ លោកស្រីអះអាងថា “វៀតណាមមានមូលដ្ឋានច្បាប់ពេញលេញ គាំទ្រដោយភស្តុតាងប្រវត្តិសាស្ត្រ ដើម្បីបង្កើតអធិបតេយ្យភាពរបស់ខ្លួនលើប្រជុំកោះ Spratly”។

គួរបញ្ជាក់ថា Itu Aba ហៅថា Ba Binh ជាភាសាវៀតណាម គឺជាកោះដែលកើតឡើងដោយធម្មជាតិ និងដីដ៏ធំបំផុតនៅក្នុងប្រជុំកោះ Spratly ដែលមានទីតាំងនៅក្នុងដែនទឹករបស់ប្រទេសវៀតណាម និងតំបន់សេដ្ឋកិច្ចផ្តាច់មុខ (EEZ)។ តៃវ៉ាន់បានកាន់កាប់កោះដោយខុសច្បាប់ ហើយបានពង្រាយកម្លាំងយោធានៅទីតាំងនោះ៕