ឥណ្ឌូណេស៊ីធ្វើសមយុទ្ធកងទ័ពជើងទឹកពហុភាគី ចំពេលមានភាពតានតឹងនៅអាស៊ីប៉ាស៊ីហ្វិក

ហ្សាការតា៖ ប្រទេសឥណ្ឌូនេស៊ីបានចាប់ផ្តើមសមយុទ្ធកងទ័ពជើងទឹកពហុភាគីនៅក្នុងដែនទឹករបស់ខ្លួន រួមជាមួយនឹងកងទ័ពជើងទឹកមកពីប្រទេសនានា រួមមានសហរដ្ឋអាម៉េរិក អង់គ្លេស ចិន ជប៉ុន រុស្ស៊ី និងកូរ៉េខាងត្បូង ចំពេលមានភាពតានតឹងនៅក្នុងតំបន់អាស៊ីប៉ាស៊ីហ្វិក។

កងទ័ពជើងទឹកឥណ្ឌូនេស៊ីបាននិយាយនៅក្នុងសេចក្តីថ្លែងការណ៍មួយថា សមយុទ្ធ Komodo គឺជាសមយុទ្ធ "មិនមែនជាសង្គ្រាមឡើយ" ដែលមានគោលបំណង "ពង្រឹងទំនាក់ទំនងរវាងកងទ័ពជើងទឹក" នៃប្រទេសចំនួន ៣៦ ។

សមយុទ្ធនេះកើតឡើងនៅពេលដែលចិន និងសហរដ្ឋអាម៉េរិកបង្កើនការទូតផ្នែកយោធានៅក្នុងតំបន់ ដោយរៀបចំល្បែងសង្រ្គាមញឹកញាប់ជាងមុនជាមួយសម្ព័ន្ធមិត្ត និងដៃគូជុំវិញតៃវ៉ាន់ និងនៅក្នុងផ្លូវទឹកដ៏មមាញឹកនៃសមុទ្រចិនខាងត្បូង និងប៉ាស៊ីហ្វិកខាងលិច។

សមយុទ្ធនេះក៏ធ្វើឡើងបន្ទាប់ពីឧប្បត្តិហេតុកាលពីចុងសប្តាហ៍នៅច្រកសមុទ្រតៃវ៉ាន់ ដែលកងនាវាចរអាម៉េរិកបាននិយាយថា នាវាចម្បាំងចិនបានកាត់ពីមុខនាវាពិឃាតអាម៉េរិកក្នុង "អន្តរកម្មមិនមានសុវត្ថិភាព" ។ កងនាវាចរឥណ្ឌូណេស៊ីបាននិយាយថា នាវាចំនួន ១៥ គ្រឿង រួមទាំងពីប្រទេសចិន និងរុស្ស៊ី បានទម្លាក់យុថ្កាចេញពីកោះ Sulawesi កាលពីថ្ងៃចន្ទ ខណៈដែលសមយុទ្ធ Komodo បានចាប់ផ្តើម។

ប្រព័ន្ធផ្សព្វផ្សាយរដ្ឋរបស់ចិន CCTV បានរាយការណ៍កាលពីថ្ងៃចន្ទថា កងទ័ពជើងទឹកចិនបានបញ្ជូននាវាពិឃាត Zhanjiang និងនាវាចម្បាំង Xuchang ដែលបំពាក់ដោយមីស៊ីល ទៅកាន់តំបន់សមយុទ្ធ។ សមយុទ្ធ Komodo ឆ្នាំនេះ គឺជាសមយុទ្ធកងទ័ពជើងទឹករួមគ្នាលើកទីបួន ដែលឥណ្ឌូនេស៊ីធ្វើម្ចាស់ផ្ទះ ចាប់តាំងពីការធ្វើសមយុទ្ធលើកដំបូងក្នុងឆ្នាំ ២០១៤៕