ចារកម្មកំពូលអាម៉េរិកធ្វើទស្សនកិច្ចជាសម្ងាត់នៅប្រទេសចិន

អាម៉េរិក៖ ប្រធានាធិបតីអាម៉េរិក Joe Biden បានបញ្ជូននាយក CIA លោក William Burns ទៅកាន់ទីក្រុងប៉េកាំងកាលពីខែមុន ដើម្បីជួបជាមួយមន្ត្រីស៊ើបការណ៍សម្ងាត់ចិន នេះបើយោងតាមសារព័ត៌មាន Financial Times បានរាយការណ៍កាលពីថ្ងៃសុក្រ ដោយដកស្រង់ប្រភពអនាមិករបស់អាម៉េរិក។

បណ្តាញផ្សព្វផ្សាយបានពិពណ៌នាលោក Burns ថាជា "មន្ត្រីដែលគួរឱ្យទុកចិត្តបំផុតមួយរបស់លោក Biden ហើយបានអះអាងថា ដំណើរទស្សនកិច្ចនេះបង្ហាញពី "ការព្រួយបារម្ភដែលសេតវិមានតែបារម្ភជុំវិញនៃទំនាក់ទំនងរវាងប្រទេសចិន និងសហរដ្ឋអាម៉េរិក។

ម្នាក់ក្នុងចំណោមពួកគេ ដែលត្រូវបានកំណត់អត្តសញ្ញាណត្រឹមតែជាមន្ត្រីអាម៉េរិកម្នាក់ បាននិយាយថា លោក Burns "បានជួបជាមួយសមភាគីចិន ហើយបានសង្កត់ធ្ងន់លើសារៈសំខាន់នៃការរក្សាទំនាក់ទំនងបើកចំហរនៅក្នុងបណ្តាញស៊ើបការណ៍សម្ងាត់"។

យ៉ាងណាមិញវាមិនច្បាស់ទេថាតើលោក Burns បានធ្វើដំណើរទៅកាន់ទីក្រុងប៉េកាំងមុន ឬក្រោយកិច្ចប្រជុំកាលពីថ្ងៃទី ១០ ខែឧសភា រវាងទីប្រឹក្សាសន្តិសុខជាតិរបស់លោក Biden លោក Jake Sullivan និងអ្នកការទូតជាន់ខ្ពស់របស់ប្រទេសចិន លោក Wang Yi នៅទីក្រុងវីយែន។

ចំណែកមន្ទីរបញ្ចកោណបានត្អូញត្អែរកាលពីថ្ងៃទី ២៥ ខែឧសភាថា ប្រទេសចិនមិនបានឆ្លើយតបចំពោះការទម្លាយព័ត៌មានសម្ងាត់របស់យោធាអាម៉េរិកនោះទេ។ រដ្ឋមន្ត្រីការពារជាតិចិន លោក Li Shangfu បានបដិសេធមិនជួបជាមួយសមភាគីអាម៉េរិក លោក Lloyd Austin ក្នុងសន្និសីទ Shangri-La Dialogue ក្នុងប្រទេសសិង្ហបុរី កាលពីចុងសប្តាហ៍មុន។

គួរបញ្ជាក់ថា Burns គឺជាអតីតអ្នកការទូតម្នាក់ដែលបានចំណាយពេលបីឆ្នាំជាឯកអគ្គរដ្ឋទូតសហរដ្ឋអាម៉េរិកប្រចាំនៅប្រទេសរុស្ស៊ី (២០០៥-២០០៨) និងជាអនុរដ្ឋលេខាធិការមុនពេលចូលនិវត្តន៍នៅឆ្នាំ ២០១៤។ លោក Biden បានតែងតាំងគាត់ជានាយក CIA នៅឆ្នាំ ២០២១។ គាត់មានប្រវត្តិនៃបេសកកម្មសម្ងាត់ជំនួសលោក Biden ទៅកាន់ទីក្រុងមូស្គូក្នុងខែវិច្ឆិកា ឆ្នាំ ២០២១ និងទីក្រុងគៀវក្នុងខែមករា ឆ្នាំ ២០២២ មុនពេលដែលជម្លោះអ៊ុយក្រែនកើនឡើង៕