នីហ្សេរីយ៉ា៖ មេដឹកនាំថ្មីរបស់នីហ្សេរីយ៉ាថ្មីគឺលោក Bola Ahmed Tinubu បានស្បថចូលកាន់តំណែងជាផ្លូវការរបស់ប្រធានាធិបតីទី ១៦ នៃប្រជាជាតិអាហ្វ្រិកដែលមានប្រជាជនច្រើនបំផុតដោយពិធីស្បថចូលកាន់តំណែងនេះធ្វើឡើងក្នុងទីក្រុង Abuja រដ្ឋធានីនៃប្រទេសនីហ្សេរីយ៉ា។
លោក Tinubu អតីតអភិបាលរដ្ឋ Lagos ភាគនិរតីបានគូសបញ្ជាក់ពីចក្ខុវិស័យ និងផែនការរបស់លោកសម្រាប់ការរីកចម្រើនរបស់ប្រទេសនីហ្សេរីយ៉ា ដោយសង្កត់ធ្ងន់លើតម្រូវការសម្រាប់កំណើនសេដ្ឋកិច្ច និងការប្រយុទ្ធប្រឆាំងនឹងអំពើភេរវកម្ម និងឧក្រិដ្ឋកម្ម ដែលបានញាំញីប្រទេសក្នុងប៉ុន្មានឆ្នាំថ្មីៗនេះ។
លោក Tinubu បានប្តេជ្ញាលុបបំបាត់អំពើភេរវកម្ម និងឧក្រិដ្ឋកម្មរបស់ប្រទេសនីហ្សេរីយ៉ា ហើយលោកនឹងធ្វើកំណែទម្រង់ស្ថាបត្យកម្មសន្តិសុខ និងវិនិយោគបន្ថែមទៀតលើក្រុមសន្តិសុខ ដោយផ្តល់ឱ្យពួកគេនូវការបណ្តុះបណ្តាល និងឧបករណ៍កាន់តែប្រសើរឡើង។
លោក Tinubu បាននិយាយថា "យើងនឹងការពារជាតិពីអំពើភេរវកម្ម និងគ្រប់ទម្រង់នៃឧក្រិដ្ឋកម្ម ដែលគំរាមកំហែងដល់សន្តិភាព និងស្ថិរភាពនៃប្រទេសរបស់យើង។ យើងនឹងកែប្រែសេដ្ឋកិច្ចរបស់យើងឡើងវិញ ដើម្បីនាំមកនូវកំណើនថ្មីសម្រាប់ប្រទេសនីហ្សេរីយ៉ា និងប្រជាជននីហ្សេរីយ៉ា"។
អ្នកនយោបាយជើងចាស់អាយុ ៧១ ឆ្នាំរូបនេះបានប្តថា លោកក៏នឹងបញ្ចប់ភាពក្រីក្រខ្លាំង ធ្វើឱ្យអាហារកាន់តែសម្បូរបែប ធានាការរួមបញ្ចូលសម្រាប់ស្ត្រី និងយុវជន និងប្រយុទ្ធប្រឆាំងអំពើពុករលួយ។ លោក Tinubu ដែលជាអ្នកនយោបាយដ៏មានប្រជាប្រិយភាពមួយ បានទទួលជ័យជម្នះនៅក្នុងការបោះឆ្នោតជ្រើសរើសប្រធានាធិបតីដែលមានការប្រកួតប្រជែងយ៉ាងខ្លាំងដែលបានធ្វើឡើងនៅក្នុងខែកុម្ភៈកន្លងទៅ៕
