សៀងហៃ៖ ប្រទេសចិនបានអះអាងថា ខ្លួនកំពុងបណ្តេញកុងស៊ុលរបស់ប្រទេសកាណាដាក្នុងទីក្រុងសៀងហៃចេញ បន្ទាប់ពីទីក្រុងអូតាវ៉ាមានភាពចម្រូងសម្រាស់ជាមួយប្រទេសចិន។ ក្រសួងការបរទេសរបស់ទីក្រុងប៉េកាំងបានដាក់ឈ្មោះលោកស្រី Jennifer Lynn Lalonde ថា "persona non grata" ដែលមានន័យថាប្រទេសចិនមិនស្វាគមន៍វត្តមានរបស់លោកស្រីដែលជាប្រមុខទូតកាណាដាក្នុងប្រទេសចិនទៀតឡើយ។ លោកស្រី Lalonde ត្រូវបានគេប្រាប់ឱ្យចាកចេញពីប្រទេសចិននៅថ្ងៃទី ១៣ ខែឧសភា។
សេចក្តីថ្លែងការណ៍បាននិយាយថា "ប្រទេសចិនថ្កោលទោសយ៉ាងម៉ឺងម៉ាត់ និងប្រឆាំងយ៉ាងម៉ឺងម៉ាត់ចំពោះរឿងនេះ ហើយបានធ្វើការបង្រ្កាបយ៉ាងធ្ងន់ធ្ងរ និងការតវ៉ាយ៉ាងខ្លាំងទៅកាន់ប្រទេសកាណាដា" ដោយសំអាងលើការសម្រេចចិត្តរបស់អូតាវ៉ាក្នុងការបណ្តេញអ្នកការទូតចិននៅទីក្រុងតូរ៉ុនតូចេញ។ មន្រ្តីចិនអះអាងថា "ជាវិធានការឆ្លើយតបទៅវិញទៅមកក្នុងប្រតិកម្មចំពោះទង្វើមិនសមរម្យរបស់ប្រទេសកាណាដា ប្រទេសចិនសម្រេចចិត្តប្រកាសបណ្តេញលោកស្រី Jennifer Lynn Lalonde កុងស៊ុលនៃអគ្គកុងស៊ុលកាណាដាប្រចាំទីក្រុងសៀងហៃ persona non grata" ដោយ"ចិនរក្សាសិទ្ធិក្នុងប្រតិកម្មបន្ថែមទៀត"។
ចំណាត់ការរបស់ទីក្រុងប៉េកាំងកើតឡើងបន្ទាប់ពីរដ្ឋមន្ត្រីការបរទេសកាណាដាលោកស្រី Melanie Joly បាននិយាយថា អ្នកការទូតចិនដែលមានមូលដ្ឋាននៅទីក្រុង Toronto លោក Zhao Wei នឹងត្រូវចាកចេញពីប្រទេសកាណាដា។ លោកស្រីបាននិយាយថា ប្រទេសកាណាដានឹងមិនអត់ឱនចំពោះទម្រង់ណាមួយនៃការជ្រៀតជ្រែកពីបរទេសនៅក្នុងកិច្ចការផ្ទៃក្នុងរបស់យើងឡើយ។ លោកស្រីបន្ថែមថា"យើងនៅតែរឹងមាំក្នុងការតាំងចិត្តរបស់យើងថាការការពារលទ្ធិប្រជាធិបតេយ្យរបស់យើងមានសារៈសំខាន់បំផុត" ដោយបន្ថែមថាអ្នកការទូតបរទេសនៅក្នុងប្រទេសកាណាដា "ត្រូវបានព្រមានថាប្រសិនបើពួកគេចូលរួមក្នុងអាកប្បកិរិយាបែបនេះពួកគេនឹងត្រូវបញ្ជូនទៅផ្ទះវិញដូចចិនអញ្ចឹង" ។ ការបណ្តេញចេញនេះបានធ្វើឱ្យប្រទេសទាំងពីរធ្លាក់ចូលទៅក្នុងជម្លោះការទូតថ្មី បន្ទាប់ពីទំនាក់ទំនងដ៏ជូរចត់ជាច្រើនឆ្នាំ៕
