វៀតណាម៖ គយ និងភ្នាក់ងារផ្សេងទៀតនៃប្រទេសវៀតណាម បានរកឃើញស្នែងរមាស ១១,៨ គីឡូក្រាម និងភ្លុកដំរី ៤,៧ គីឡូក្រាម ដែលបានរត់ពន្ធចូលប្រទេសវៀតណាម តាមច្រកអាកាសយានដ្ឋាន Noi Bai ក្នុងទីក្រុងហាណូយ។ យោងតាមអគ្គនាយកដ្ឋានគយវៀតណាម ការរកឃើញស្នែង និងភ្លុកដំរីនេះ ត្រូវបានធ្វើឡើងបន្ទាប់ពីការត្រួតពិនិត្យលើវ៉ាលីសង្ស័យរបស់អ្នកដំណើរម្នាក់ដែលមកដល់ព្រលានយន្តហោះកាលពីថ្ងៃទី ២៥ ខែមេសា ពីទីក្រុងដូហា។
ជនសង្ស័យបានឲ្យដឹងថាគាត់បានចាកចេញពីប្រទេសវៀតណាមទៅកាន់ប្រទេសអង់ហ្គោឡានៅថ្ងៃទី ២៩ ខែមីនានិងប្រទេសអង់ហ្គោឡាទៅកាន់ទីក្រុងដូហានៅថ្ងៃទី ២១ ខែមេសាហើយបន្ទាប់មកត្រលប់ទៅប្រទេសវៀតណាមវិញ។ គាត់បានសារភាពថាគាត់នៅអង់ហ្គោឡា គាត់ត្រូវបានជួលដោយបុរសម្នាក់ឱ្យដឹកជញ្ជូនកញ្ចប់ចំនួនពីរដែលមានស្នែង និងភ្លុកដំរី ជាមួយនឹងប្រាក់ឈ្នួលចំនួន 50 លានដុង (២,១៣០ ដុល្លារអាម៉េរិក)សមត្ថកិច្ចកំពុងបន្តការស៊ើបអង្កេតលើករណីនេះបន្ត។
ប្រទេសវៀតណាមបានហាមឃាត់ការជួញដូរភ្លុកដំរីតាំងពីឆ្នាំ ១៩៩២។ ការជួញដូរ រក្សាទុក និងដឹកជញ្ជូនភ្លុកត្រូវបានហាមឃាត់ ដោយអ្នកល្មើសនឹងពិន័យជាប្រាក់ពី ៥ ទៅ ៥០ លានដុង ឬដាក់ពន្ធនាគារពី ៦ ខែទៅ ៥ ឆ្នាំ។
ស្នែងរមាសក៏ត្រូវបានហាមឃាត់យ៉ាងតឹងរ៉ឹងក្នុងការជួញដូរ នាំចូល ឬនាំចេញពីប្រទេសវៀតណាម ដោយសារសត្វរមាសស្ថិតក្នុងបញ្ជីសត្វព្រៃជិតផុតពូជ ដែលត្រូវបានការពារដោយអនុសញ្ញាស្តីពីពាណិជ្ជកម្មអន្តរជាតិក្នុងប្រភេទសត្វជិតផុតពូជនៃសត្វព្រៃ និងរុក្ខជាតិ (CITES) របស់ប្រទេសវៀតណាមចាប់តាំងពីឆ្នាំ១៩៩៤មក៕
