ប៉ាគីស្ថាន៖ យ៉ាងហោចណាស់មនុស្ស ១៦នាក់បានស្លាប់ និងរាប់សិបនាក់ផ្សេងទៀតបានរងរបួស នៅក្នុងការបំផ្ទុះគ្រាប់បែកពីរលើក ដែលផ្ទុះឡើងនៅស្ថានីយប៉ូលីសមួយ នៅភាគពាយព្យប្រទេសប៉ាគីស្ថាន។
លោក Shafiullah Khan Gandapur មន្ត្រីប៉ូលិសក្នុងតំបន់បាននិយាយថា ក្រៅពីអ្នកស្លាប់ និងរបួស អគារជាច្រើនត្រូវបានខូចខាតយ៉ាងធ្ងន់ធ្ងរនៅក្នុងការបំផ្ទុះដែលបានកើតឡើងនៅក្នុងស្ថានីយប៉ូលីស Counter Terrorism (CTD) ក្នុងតំបន់ Kabal ក្នុងខេត្ត Khyber Pakhtunkhwa ។ ឧបទ្ទវហេតុអគ្គិភ័យដែលកើតមានជាបន្តបន្ទាប់ក៏បានជាប់ប៉ូលិសប្រមាណ២០នាក់ផងដែរ។
ការផ្ទុះនេះបានកើតឡើងនៅឃ្លាំងដែលប្រើសម្រាប់គ្រាប់រំសេវ និងកាំភ្លើងត្បាល់ដែលរក្សាទុកដោយអង្គភាពប្រឆាំងភេរវកម្មនៅខាងក្នុងប៉ុស្តិ៍ប៉ូលីស ហើយមិនមានការវាយប្រហារណាមួយសំដៅទៅលើស្ថានីយពីខាងក្រៅនោះទេ។ ប៉ូលិសបានបើកការស៊ើបអង្កេតលើមូលហេតុនៃការបំផ្ទុះនេះភ្លាមៗ៕
