នាយករដ្ឋមន្ត្រីជប៉ុន Fumio Kishida ត្រូវបានជម្លៀសខ្លួនចេញក្រោយមានការបំផ្ទុះគ្រាប់បែក

ជប៉ុន៖ នាយករដ្ឋមន្ត្រីជប៉ុនលោក Fumio Kishida ត្រូវបានជម្លៀសចេញភ្លាមៗពីព្រឹត្តិការណ៍សាធារណៈមួយ បន្ទាប់ពីជនសង្ស័យបានគប់គ្រាប់បែកផ្សែងទៅលើរូបគាត់។ ប្រព័ន្ធផ្សព្វផ្សាយក្នុងស្រុកបានរាយការណ៍ថា បុរសម្នាក់ត្រូវបានចាប់ខ្លួននៅកន្លែងកើតហេតុក្នុងទីក្រុង Wakayama ជាកន្លែងដែលលោក Kishida កំពុងថ្លែងសុន្ទរកថា។

សាក្សីម្នាក់បាននិយាយថា ពួកគេបានឃើញជនសង្ស័យម្នាក់បានគប់គ្រាប់បែកផ្សែង ដោយពួកគេបានឮសំឡេងផ្ទុះយ៉ាងខ្លាំង។ ទូរទស្សន៍សាធារណៈ NHK របស់ប្រទេសជប៉ុនបានដកស្រង់សម្តីលោក Kishida ថា "ការផ្ទុះយ៉ាងខ្លាំង" នៅកន្លែងប្រារព្ធពិធី។ ប៉ូលិសកំពុងស៊ើបអង្កេតលម្អិត។

លោក Kishida ទើបតែចាប់ផ្តើមថ្លែងសុន្ទរកថា បន្ទាប់ពីបានទៅទស្សនាកំពង់ផែនេសាទក្នុងទីក្រុង Wakayama សម្រាប់ព្រឹត្តិការណ៍យុទ្ធនាការមួយ ។បន្ទាប់ពីឧប្បត្តិហេតុនេះ លោក Kishida បាននិយាយទៅកាន់ហ្វូងមនុស្សនៅកន្លែងផ្សេងទៀត ដោយលោកចាត់ទុកថា ឧបទ្ទវហេតុនេះមិនគួររំខានដល់ដំណើរការបោះឆ្នោតនោះទេ៕