លោកតាបណ្ឌិត កុល ផេង នាំយកកម្មវិធីសិក្សាដ៏សំខាន់មួយមកកម្ពុជា ដែលទទួលស្គាល់ដោយ John Maxwell

ភ្នំពេញ៖ លោកតាបណ្ឌិតកុល ផេង កាលពីថ្ងៃទី ១៣ ខែ មីនា ឆ្នាំ២០២៣ បានចូលរួមកម្មវិធីមួយនៅអាមេរិកដែលជាកម្មវិធីរៀបចំដោយក្រុមការងាររបស់លោកបណ្ឌិត John Maxwell។

លោកតាបណ្ឌិត កុល ផេង ដែលជាបិតាស្ថាបនិក និងជាប្រធានសាកលវិទ្យាល័យបញ្ញាសាស្រ្តកម្ពុជា បានថ្លែងប្រាប់ស៊ីស៊ីថាមស៍ថា លោកតាបានចូលរួមកម្មវិធីមួយនៅអាម៉េរិក និងបានជួបជាមួយ John Maxwell ដោយបានធ្វើការពិភាក្សាយ៉ាងសកម្មពាក់ព័ន្ធនឹងការបង្រៀនភាពជាអ្នកដឹកនាំទៅកាន់យុវជន។

ក្នុងកិច្ចសន្ទនានៃជំនួបមួយនោះ បានលេចចេញនូវសមិទ្ធផលមួយសម្រាប់សាលាបញ្ញាសាស្ត្រដោយសារតែលោកតាកំពុងនឹងរៀបចំកម្មវិធីសិក្សាបន្ថែមទៀតទៅលើភាពជាអ្នកដឹកនាំនៅក្នុងការអប់់រំសិស្សនៅកម្រិតទី៧ ដល់ទី១២ រួមទាំងសិស្សដែលកំពុងសិក្សានៅសាកលវិទ្យាល័យផងដែរ។

លោកតាបានបន្ថែមទៀតផងដែរថា កម្មវិធីសិក្សាពាក់ព័ន្ធនឹងភាពជាអ្នកដឹកនាំនេះ គឺលោកតាបានបញ្ជ្រាបសម្រាប់សិស្សនៅសាលាបញ្ញាសាស្រ្តកន្លងមកជាច្រើនមកហើយ ក៏ប៉ុន្តែលោកតាផ្តោតសំខាន់ដោយពឹងផ្អែកលើការដឹកនាំក្រោមរបៀបតាមព្រះពុទ្ធសាសនា គឺលោកតាផ្តោតសំខាន់ថាដើម្បីក្លាយជាអ្នកដឹកនាំល្អ អ្នកដឹកនាំ គួរតែមាន សីល សមាធិ បញ្ញា។

ចំណែកឯការដឹកនាំដែលលោកតានឹងបញ្ជ្រាបចូលបន្ថែមទៀតក្នុងពេលខាងមុខនេះជាកម្មវិធីបែបដឹកនាំបែបសកលលោកដែលមានការទទួលស្គាល់ដោយពិភពលោក គឺតាមបែបលោក John Maxwell។

ជាចុងក្រោយលោកតាបានរៀបរាប់បន្ថែមទៀតថា ការនាំចូលកម្មវិធីសិក្សាមួយនេះជាសមិទ្ធផលមួយដែលល្អសម្រាប់យុវជនពីព្រោះថា យុវជនគ្រប់រូបគួរតែមានជំនាញនៃភាពដឹកនាំដើម្បីអាចសម្រេចការងារប្រកបដោយប្រសិទ្ធភាព៕