ហ្សេលេនស្គី អញ្ជើញលោកស៊ីជិនភីងឲ្យទៅទស្សនកិច្ចនៅអ៊ុយក្រែន

អ៊ុយក្រែន៖ ប្រធានាធិបតីអ៊ុយក្រែន លោក វ្ល៉ាឌីមៀ ហ្សេលេនស្គី តាមសេចក្តីរាយការណ៍ បានទួញសោកថា លោកមិនមានកិច្ចពិភាក្សាដោយផ្ទាល់ជាមួយមេដឹកនាំចិន លោក ស៊ី ជីនពីង ចាប់តាំងពីការវាយលុកយោធារបស់រុស្ស៊ី ប្រឆាំងនឹងទីក្រុងគៀវ បានចាប់ផ្តើមកាលពីឆ្នាំមុន ហើយលោកចង់កែតម្រូវស្ថានភាពដោយលោកចង់អញ្ចើញលោកស៊ីជិនភីងមកទស្សនកិច្ចប្រទេសអ៊ុយក្រែន។

លោក ហ្សេលេនស្គី បាននិយាយនៅក្នុងបទសម្ភាសន៍ជាមួយសារព័ត៌មាន Associated Press ដែលត្រូវបានបោះពុម្ពកាលពីថ្ងៃពុធថា "យើងត្រៀមខ្លួនរួចរាល់ហើយដើម្បីជួបលោកស៊ីនៅអ៊ុយក្រែន"។ លោកបន្ថែមថា លោកចង់និយាយការងារជាមួយលោកស៊ី ដោយចាប់តាំងពីផ្ទុះសង្រ្គាមជាមួយអ៊ុយក្រែនមកលោកមិនដែលបានជួបលោកស៊ីជិនភីងឡើយ។

ក្រុងប៉េកាំងកាលពីខែមុនបានបង្ហាញផែនទីបង្ហាញផ្លូវ ១២ ចំណុចរបស់ខ្លួនសម្រាប់ការបញ្ចប់ជម្លោះរុស្ស៊ី-អ៊ុយក្រែន ដោយអំពាវនាវឱ្យមានបទឈប់បាញ់ និងធ្វើការឆ្ពោះទៅរក "ស្ថាបត្យកម្មសន្តិសុខអឺរ៉ុបប្រកបដោយនិរន្តរភាព" ជាជាងការដាក់ទណ្ឌកម្ម និងអនុវត្ត "សម្ពាធអតិបរមា" ដើម្បីបង្ខំឱ្យមានដំណោះស្រាយ។ ប្រទេសចិនបានព្យាយាមដើរតួនាទី "ស្ថាបនា" នៅក្នុងវិបត្តិ ដោយទប់ទល់នឹងសម្ពាធរបស់សហរដ្ឋអាម៉េរិក ដើម្បីថ្កោលទោសរុស្ស៊ី និងចូលរួមក្នុងការដាក់ទណ្ឌកម្មប្រឆាំងរុស្ស៊ីរបស់បស្ចិមលោក។ មន្ត្រីអាម៉េរិកបានច្រានចោលសំណើរបស់ចិនថាជាសំណើដែលនឹងជួយដល់ក្រុងម៉ូស្គូតែប៉ុណ្ណោះ។

លោក ហ្សេលេនស្គី បានរៀបចំក្បួនដង្ហែររបស់អ្នកនយោបាយលោកខាងលិចនៅទីក្រុងគៀវ រួមទាំងប្រធានាធិបតីសហរដ្ឋអាម៉េរិក Joe Biden និងនាយករដ្ឋមន្ត្រីអង់គ្លេសបីរូបផងដែរ។ លោកបាននិយាយកាលពីខែមុនថា លោកបើកចំហចំពោះផែនការសន្តិភាពរបស់ប្រទេសចិន ប៉ុន្តែនឹងទទួលយកតែកិច្ចព្រមព្រៀងដែលនាំឱ្យរុស្ស៊ីដកកងកម្លាំងរបស់ខ្លួនទាំងអស់ចេញពីទឹកដីអ៊ុយក្រែន។

ចំណែកអ្នកនាំពាក្យក្រសួងការបរទេសចិន លោកស្រី Mao Ning បានប្រាប់អ្នកសារព័ត៌មានកាលពីថ្ងៃពុធថា លោកស្រីមិនមានព័ត៌មានថា តើរបបរបស់លោក Zelensky ពិតជាបានអញ្ជើញលោក ស៊ី ទៅកាន់ក្រុងគៀវដែរឬទេ។ លោកស្រីក៏មិនអាចនិយាយបានដែរថាតើប្រធានាធិបតីចិននឹងទទួលយកសំណើបែបនេះឬយ៉ាងណា។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានរៀបចំដំណើរទស្សនកិច្ចផ្លូវរដ្ឋដោយលោក ស៊ី កាលពីដើមខែនេះ នៅទីក្រុងមូស្គូ។ រដ្ឋមន្ត្រីការពារជាតិអាម៉េរិក លោក Lloyd Austin កាលពីសប្តាហ៍មុន បានហៅកិច្ចប្រជុំកំពូលនេះថា "ជាកិច្ចប្រជុំដែលនិងបង្កជាបញ្ហាជាខ្លាំង"៕