កូរ៉េខាងជើងធ្វើតេស្ដ "ដ្រូននុយក្លេអ៊ែរ"

កូរ៉េខាងជើង៖ កូរ៉េខាងជើងបានចាប់ផ្តើមធ្វើការសាកល្បងអាវុធចុងក្រោយបំផុតចំនួនពីររបស់ខ្លួន ដែលទាំងពីរដោយក្នុងនោះមានទាំងដ្រូននុយក្លេអ៊ែរក្នុងទឹកថែមទៀតផង។ កូរ៉េខាងជើងបានបាញ់មីស៊ីលផ្លោងជាច្រើនគ្រាប់ចូលទៅក្នុងសមុទ្រ នៅប៉ុន្មានម៉ោងមុនពេលនាវាចម្បាំងអាម៉េរិកមួយគ្រឿងនឹងមកដល់កូរ៉េខាងត្បូងដើម្បីធ្វើសមយុទ្ធ។

មន្រ្តីទីក្រុងព្យុងយ៉ាងបានឲ្យដឹងថា ខ្លួនបានធ្វើការសាកល្បងលើ "ដ្រូននុយក្លេអ៊ែរបើបរក្នុងទឹក" ថ្មីរបស់ខ្លួននៅចន្លោះថ្ងៃទី ២៥ និង ២៧ ខែមីនាដោយការសាកស្បងបានសម្រេចដោយជោគជ័យ។ មន្រ្តីកូរ៉េខាងជើងបន្ថែមថា ពីមុនត្រូវបានគេដាក់ឈ្មោះថាជាអាវុធសម្ងាត់ យោធារបស់ប្រទេសកូរ៉េខាងជើងបានអះអាងថា វេទិកានេះអាចបង្កើត "រលកយក្សស៊ូណាមិវិទ្យុសកម្ម" ដោយប្រើការផ្ទុះនៅក្រោមទឹក និង "បំផ្លាញក្រុមនាវាសត្រូវ"។

ទីភ្នាក់ងារសារព័ត៌មានរដ្ឋកូរ៉េ (KCNA) បានរាយការណ៍ថា អាវុធនេះនៅតែស្ថិតនៅក្រោមទឹកអស់រយៈពេលជាង ៤១ ម៉ោង ហើយត្រូវបានបំផ្ទុះនៅក្នុងដែនទឹកនៃឆ្នេរសមុទ្រភាគខាងកើតរបស់ប្រទេសកូរ៉េខាងជើង។

នៅក្នុងសមយុទ្ធនាពេលថ្មីៗនេះ មីស៊ីលផ្លោងយុទ្ធសាស្ត្រត្រូវបានផ្ទុកដោយគ្រាប់បែក "ក្លែងធ្វើក្បាលគ្រាប់នុយក្លេអ៊ែរ" ដើម្បីសាកល្បង "ការត្រៀមបាញ់" របស់យោធា បន្ទាប់មកដោយ "ការវាយប្រហារនុយក្លេអ៊ែរនិម្មិត" ដែលក្បាលគ្រាប់សាកល្បងត្រូវបានបំផ្ទុះនៅចម្ងាយ ៥០០ ម៉ែត្រពីលើគោលដៅរបស់ពួកគេ។ មេបញ្ជាការនៃអង្គភាពបាញ់បង្ហោះបាននិយាយថា សមយុទ្ធនេះបានបញ្ជាក់ថា ប្រសិនបើយើងប្រយុទ្ធ យើងប្រាកដជាបំផ្លាញសត្រូវបាន។

ក្នុងអំឡុងពេលកិច្ចប្រជុំនៃគណបក្សពលករដែលកំពុងកាន់អំណាចកាលពីថ្ងៃចន្ទ មេដឹកនាំកូរ៉េខាងជើងលោក គីម ជុងអ៊ុន បានសង្កត់ធ្ងន់លើតម្រូវការដើម្បី "ពង្រឹងគុណភាពនៃកងកម្លាំងនុយក្លេអ៊ែររបស់កូរ៉េខាងជើង" ហើយបាននិយាយថាគាត់បាន "ពិនិត្យឡើងវិញនូវផែនការប្រតិបត្តិការវាយលុកនុយក្លេអ៊ែរដែលបានរៀបចំ" នៅក្នុងព្រឹត្តិការណ៍នៃការ ជម្លោះណាមួយដែលអាចនិងកើតឡើង។

ការសាកល្បងចុងក្រោយបំផុតរបស់កូរ៉េខាងជើងបានកើតឡើងចំពេលមានភាពតានតឹងកាន់តែខ្លាំងឡើងរវាងទីក្រុងព្យុងយ៉ាង និងទីក្រុងវ៉ាស៊ីនតោន និងទីក្រុងសេអ៊ូល ដោយសហរដ្ឋអាម៉េរិកបានដឹកនាំសមយុទ្ធយោធាដ៏ធំនៅក្នុងតំបន់ក្នុងរយៈពេលប៉ុន្មានខែថ្មីៗនេះ ដែលកូរ៉េខាងជើងបានថ្កោលទោសម្តងហើយម្តងទៀតថាជាការរៀបចំសម្រាប់ការវាយប្រហារគឺជាការគំរាមគំហែងមកកាន់ប្រទេសកូរ៉េខាងជើង។

យោធាកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា "យើងនឹងតាមដានយ៉ាងដិតដល់នូវសកម្មភាពផ្សេងៗរបស់កូរ៉េខាងជើង និងរក្សាជំហរត្រៀមខ្លួនយ៉ាងម៉ឺងម៉ាត់ ដោយផ្អែកលើសមត្ថភាពក្នុងការឆ្លើយតបដ៏លើសលប់ចំពោះការបង្កហេតុណាមួយ" ៕