ចិន៖ លោក Jack Ma ដែលជាស្ថាបនិកក្រុមហ៊ុន Alibaba Group Holding បានត្រលប់មកប្រទេសចិនដីគោកវិញកាលពីពេលថ្មីៗនេះ បន្ទាប់ពីធ្វើដំណើរទៅក្រៅប្រទេសអស់រយៈពេលជាងមួយឆ្នាំ ហើយបានទៅទស្សនាសាលាដែលគាត់បានបង្កើតឡើងនៅទីក្រុង Hangzhou ដែលជាស្រុកកំណើតរបស់លោក។
លោក Jack Ma បានជួបជាមួយគ្រូបង្រៀន និងសិស្សនៅសាលា Yungu ដែលជាសាលាឯកជនដែលគ្របដណ្តប់ពីថ្នាក់មត្តេយ្យដល់វិទ្យាល័យ ដែលត្រូវបានផ្តល់មូលនិធិដោយស្ថាបនិក Alibaba ក្នុងឆ្នាំ ២០១៧ ។ មហាសេដ្ឋីជំនួញរូបនេះបានពិភាក្សាអំពីបញ្ហាអប់រំ និងបច្ចេកវិទ្យា ChatGPT ជាមួយសាលា។
លោក Ma បានត្រលប់មកប្រទេសចិនវិញបន្ទាប់ពីឈប់សម្រាកមួយរយៈនៅទីក្រុងហុងកុង ជាកន្លែងដែលគាត់បានជួបមិត្តភ័ក្តិ និងបានទៅលេង Art Basel មួយរយៈពេលខ្លីផងដែរ។ Ma ត្រូវបានគេដឹងថាមានចំណង់ចំណូលចិត្តលើការគូរគំនូរ និងសិល្បៈខ្លាំងណាស់។ លោក Jack Ma ដែលបានចូលនិវត្តន៍ក្នុងនាមជាប្រធាន Alibaba ក្នុងថ្ងៃខួបកំណើតទី ៥៥ របស់គាត់ក្នុងឆ្នាំ ២០១៩ បានធ្វើដំណើរទៅកាន់ប្រទេសផ្សេងៗគ្នាដើម្បីស្វែងយល់អំពីបច្ចេកវិទ្យាកសិកម្ម។ ការធ្វើដំណើររបស់គាត់ត្រូវបានតាមដានយ៉ាងជិតស្និទ្ធដោយអ្នកឃ្លាំមើលប្រទេសចិន។
លោក Jack Ma អតីតគ្រូបង្រៀនភាសាអង់គ្លេសបាននិយាយថាគាត់ចង់លះបង់ថ្ងៃក្រោយចូលនិវត្តន៍របស់គាត់ដើម្បីមនុស្សធម៌ ការអប់រំនៅជនបទ និងបន្តចំណាប់អារម្មណ៍របស់គាត់ក្នុងការធ្វើឱ្យវិស័យជនបទរបស់ប្រទេសចិនរស់ឡើងវិញ។
នៅក្នុងឱកាសនៃការបង្ហាញខ្លួនដ៏កម្រមួយចំនួន លោក Ma ត្រូវបានគេឃើញនៅអឺរ៉ុប ជប៉ុន និងចិន សម្រាប់ព្រឹត្តិការណ៍អប់រំ និងកសិកម្ម។ កាលពីដើមឆ្នាំនេះ គាត់ត្រូវបានគេឃើញនៅក្នុងប្រទេសថៃសម្រាប់ការសិក្សារបស់គាត់លើកសិកម្ម និងនេសាទ បន្ទាប់ពីគាត់ស្នាក់នៅរយៈពេល ៣ ខែនៅក្នុងប្រទេសជប៉ុន ដែលគាត់បានពិនិត្យមើលប្រតិបត្តិការ និងបច្ចេកវិទ្យានៃកសិដ្ឋានចិញ្ចឹមត្រីក្នុងប្រទេសជប៉ុនថែមទៀតផង៕
