ភ្នំពេញ៖ ក្រសួងអប់រំ យុវជន និងកីឡាអនុញ្ញាតឱ្យគ្រឹះស្ថានឧត្តមសិក្សារដ្ឋរៀបចំការប្រឡងបញ្ចប់ឆ្នាំនៅតាមគ្រឹះស្ថានសិក្សាចំនួនពីរថ្ងៃ។ នេះបើតាមសេចក្តីជូនដំណឹងរបស់ក្រសួងអប់រំ នៅថ្ងៃទី៧ ខែកក្កដានេះ។
បើតាមសេចក្តីជូនដំណឹងដដែលបានបញ្ជាក់ថា ដោយសារតែតាមលក្ខណៈបច្ចេកទេស គ្រឹះស្ថានឧត្ដមសិក្សារដ្ឋមិនអាចរៀបចំការប្រឡងអនឡាញបាន ក្រសួងអប់រំ យុវជន និងកីឡាអនុញ្ញាតឱ្យគ្រឹះស្ថានឧត្តមសិក្សារដ្ឋរៀបចំការប្រឡងបញ្ចប់ឆ្នាំ ដោយត្រូវរៀបចំបន្ទប់ប្រឡងដែលមានចំណុះ ១៥ ទៅ ២០ នាក់ក្នុងមួយបន្ទប់។
បន្ថែមលើនេះ ក្រសួងអប់រំបានបញ្ជាក់ថា ការរៀបចំការប្រឡងបញ្ចប់ឆ្នាំនៅចំនួនពីរថ្ងៃនេះ ត្រូវធានាអនុវត្តវិធានការសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោក។
គួរបញ្ជាក់ផងដែរថា សម្រាប់គ្រឹះស្ថានឧត្ដមសិក្សារដ្ឋដែលមានបំណងចង់រៀបចំការប្រឡងបញ្ចប់ឆ្នាំ ត្រូវដាក់ពាក្យស្នើសុំមកក្រសួងអប់រំ យុវជន និងកីឡា ដើម្បីពិនិត្យ និងទុកជាព័ត៌មាន៕
