ពលរដ្ឋបាំរាំងជាង១លាននាក់ចេញ«បាតុកម្ម»ប្រឆាំងច្បាប់នៃការចូលនិវត្តន៍

បារាំង៖ ពលរដ្ឋបារាំងជាង១លាននាក់នាថ្ងៃ សុក្រនេះបានបន្តចេញបាតុកម្មជាខ្លាំងខណៈអាជ្ញាធរបារាំងបានបន្តបង្ក្រាបការតវ៉ាប្រឆាំងនឹងកំណែទម្រង់ប្រាក់សោធននិវត្តន៍របស់ប្រធានាធិបតី Emmanuel Macron ។ បាតុករជាងមួយលាននាក់បានដើរតាមដងផ្លូវទូទាំងប្រទេសបារាំងដើម្បីធ្វើការបះបោរប្រឆាំងនឹងរដ្ឋាភិបាលក្នុងទីក្រុងប៉ារីស។

កម្មកររាប់ម៉ឺននាក់បានបន្តធ្វើកូដកម្ម ហើយបាតុករបានបិទការដឹកជញ្ជូនសាធារណៈ សាលារៀន និងរោងចក្រចម្រាញ់ប្រេង។ ក្នុងការប៉ុនប៉ងបំបែកការតវ៉ា ប៉ូលិសបានប្រើឧស្ម័នបង្ហូរទឹកភ្នែក កាណុងបាញ់ទឹក និងដំបង។

យ៉ាងហោចណាស់មានក្រុមអ្នកពន្លត់អគ្គិភ័យមួយក្រុមបានប្តូរមកចូលរួមជាមួយបាតុករ។ សាក្សីជាច្រើននាក់បានពណ៌នាអំពីស្ថានភាពនេះថាជា«ការគ្រប់គ្រងមិនបាន»។ បណ្តាញផ្សព្វផ្សាយឯករាជ្យមួយបានសរសេរលើ Twitter ថា៖ «វាគឺជាសង្រ្គាមមួយរវាងប្រជាជន និងមេដឹកនាំក្នុងប្រទេសបារាំង»។

រដ្ឋមន្ត្រីក្រសួងមហាផ្ទៃ លោក Garald Darmanin បាននិយាយកាលពីល្ងាចថ្ងៃព្រហស្បតិ៍ថា មន្ត្រីប៉ូលិស និងអាវុធហត្ថជិត ១៥០នាក់បានរងរបួស ដោយលោកចាត់ទុកថារឿងនេះ "មិនអាចទទួលយកបាន" និងទាមទារឱ្យមានការដាក់ទណ្ឌកម្មយ៉ាងធ្ងន់ធ្ងរសម្រាប់អ្នកវាយប្រហារ។

បាតុកម្មត្រូវបានបង្កឡើងដោយការប្រកាសរបស់លោកប្រធានាធិបតី Macron ដែលថាអាយុចូលនិវត្តន៍នឹងត្រូវលើកឡើងពីអាយុ ៦២ ទៅ ៦៤ ឆ្នាំដោយចាប់ផ្តើមនៅឆ្នាំក្រោយ។ លោក Macron បានទទូចថាការផ្លាស់ប្តូរនេះគឺចាំបាច់ បើមិនដូច្នេះទេប្រព័ន្ធសោធននិវត្តន៍នឹងក្ស័យធនក្នុងរយៈពេលប៉ុន្មានឆ្នាំខាងមុខ។

វិមាន Elysee បានកំណត់ការផ្លាស់ប្តូរដោយមិនពិគ្រោះជាមួយសមាជិកសភា ដែលបានព្យាយាមដោះស្រាយជាមួយនឹងសំណើដ៏ចម្រូងចម្រាសចាប់តាំងពីខែមករា។ ក្រុមអ្នកតវ៉ាបានឆ្លើយតបដោយការអំពាវនាវឱ្យលោក Macron លាលែងពីតំណែង។

បង្ហាញមុខតាមកញ្ចក់ទូរទស្សន៍កាលពីថ្ងៃពុធ លោក Macron បាននិយាយថា កំហុសតែមួយគត់របស់គាត់គឺ "ការបរាជ័យក្នុងការបញ្ចុះបញ្ចូលមនុស្ស" អំពីគុណសម្បត្តិនៃការសម្រេចចិត្ត ប៉ុន្តែបានទទូចថាគាត់នឹងមិនបដិសេធទេ បើទោះបីជាវាមានន័យថាត្រូវតែ "ចុះចេញពីតំណែង" ក៏ដោយ៕