អាម៉េរិក៖ កូរ៉េខាងជើងដូចជាមិនទាន់ត្រៀមនុយក្លេអ៊ែរសម្រាប់វាយប្រហារនោះទេ

វ៉ាស៊ីនតោន៖ នាយកទីភ្នាក់ងារស៊ើបការណ៍សម្ងាត់ការពារជាតិ (DIA) បានឲ្យដឹងថា មេដឹកនាំកូរ៉េខាងជើង លោក គីម ជុងអ៊ុន ហាក់ដូចជាមិនត្រៀមខ្លួន ដើម្បីធ្វើតេស្តនុយក្លេអ៊ែរ ក្នុងអំឡុងពេលសមយុទ្ធយោធា រវាងសហរដ្ឋអាម៉េរិក និងកូរ៉េខាងត្បូងនោះទេ ប៉ុន្តែសហរដ្ឋអាម៉េរិកនៅតែរក្សាការប្រុងប្រយ័ត្នជានិច្ច។

មន្ត្រីអាម៉េរិកបានព្រមានអស់រយៈពេលជិតមួយឆ្នាំថា កូរ៉េខាងជើងអាចនឹងបន្តការសាកល្បងនុយក្លេអ៊ែរជាលើកទីមួយចាប់តាំងពីឆ្នាំ ២០១៧ ដែលជាទង្វើមួយដែលនឹងត្រូវបានមើលឃើញថាជាការបង្កហេតុដ៏ធ្ងន់ធ្ងរដោយសហរដ្ឋអាម៉េរិក កូរ៉េខាងត្បូង និងជប៉ុន។

ទីប្រឹក្សាសន្តិសុខជាតិលោក Jake Sullivan និងមន្ត្រីផ្សេងទៀតបានព្រមានអំពីលទ្ធនៃការតេស្តនុយក្លេអ៊ែររបស់កូរ៉េខាងជើងក្នុងខែឧសភា ឆ្នាំ ២០២២ មុនពេលដំណើរទស្សនកិច្ចរបស់លោកប្រធានាធិបតី Joe Biden ទៅកាន់អាស៊ី។

លោក Kim អាចជ្រើសរើសពេលវេលាសាកល្បងនុយក្លេអ៊ែរ ដើម្បីស្របពេលជាមួយនឹងសមយុទ្ធ Freedom Shield ដែលកំពុងបន្តដោយយោធាអាម៉េរិក និងកូរ៉េខាងត្បូង។ សមយុទ្ធរយៈពេល ១១ថ្ងៃ គ្រោងនឹងបញ្ចប់នៅថ្ងៃព្រហស្បតិ៍៕