វៀតណាមអំពាវនាវឲ្យបញ្ចប់«អំពើហិង្សា»នៅមីយ៉ាន់ម៉ា

វៀតណាម៖ ឯកអគ្គរដ្ឋទូតវៀតណាមប្រចាំនៅអង្គការសហប្រជាជាតិបានអំពាវនាវឱ្យភាគីទាំងអស់អនុវត្តការអត់ធ្មត់ បញ្ឈប់អំពើហិង្សា និងការសន្ទនាដើម្បីឈានទៅដល់ដំណោះស្រាយដោយសន្តិវិធីចំពោះបញ្ហាមីយ៉ាន់ម៉ា។

ក្នុងអំឡុងកិច្ចប្រជុំកាលពីថ្ងៃព្រហស្បតិ៍ ដើម្បីដោះស្រាយស្ថានការណ៍នៅប្រទេសមីយ៉ាន់ម៉ា នៃមហាសន្និបាតអង្គការសហប្រជាជាតិ (UN) លោកឯកអគ្គរដ្ឋទូត Dang Hoang Giang ប្រធានគណៈប្រតិភូអចិន្ត្រៃយ៍វៀតណាមប្រចាំនៅអង្គការសហប្រជាជាតិបានមានប្រសាសន៍ថា “ភាគីពាក់ព័ន្ធត្រូវតែអនុវត្តការអត់ធ្មត់ឲ្យអស់ពីលទ្ធភាព។លោកបន្ថែមថា អំពើហឹង្សា និងចាប់ផ្តើមកិច្ចសន្ទនាប្រកបដោយអត្ថន័យ រួម” ដើម្បីឈានទៅដល់ដំណោះស្រាយសន្តិភាព និងនិរន្តរភាព ដែលស្របតាមឆន្ទៈ និងផលប្រយោជន៍របស់ប្រជាជនមីយ៉ាន់ម៉ា។

ឯកអគ្គរដ្ឋទូតរូបនេះក៏បានសម្តែងការព្រួយបារម្ភរបស់វៀតណាមចំពោះស្ថានភាពរបស់មីយ៉ាន់ម៉ា ជាពិសេសវិបត្តិមនុស្សធម៌ដ៏ធ្ងន់ធ្ងរដែលកំពុងមានផលប៉ះពាល់យ៉ាងខ្លាំងដល់ស្ត្រី និងកុមារនៅក្នុងប្រទេសនេះ។ លោក Giang បន្តថាវៀតណាមអំពាវនាវឱ្យភាគីទាំងអស់ធានាឱ្យមានលទ្ធភាពទទួលបានមនុស្សធម៌ និងវេជ្ជសាស្ត្រសម្រាប់ប្រជាជនមីយ៉ាន់ម៉ា ដោយគោរពតាមច្បាប់មនុស្សធម៌អន្តរជាតិ។

បន្ថែមពីនេះវៀតណាមស្វាគមន៍ចំពោះកិច្ចខិតខំប្រឹងប្រែងរបស់ឥណ្ឌូនេស៊ី ដែលបច្ចុប្បន្នជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) សម្រាប់ឆ្នាំ ២០២៣ ក៏ដូចជាគាំទ្រកិច្ចសហប្រតិបត្តិការជិតស្និទ្ធរវាងអង្គការសហប្រជាជាតិ និងអាស៊ាន ក្នុងការជំរុញការដោះស្រាយបញ្ហាមីយ៉ាន់ម៉ា។

វៀតណាមក៏បានអំពាវនាវដល់សហគមន៍អន្តរជាតិគាំទ្រកិច្ចខិតខំប្រឹងប្រែងរបស់អាស៊ាន ជំរុញការសន្ទនា និងការផ្សះផ្សាដោយឈរលើមូលដ្ឋានគោរពអធិបតេយ្យភាព ឯករាជ្យ និងបូរណភាពទឹកដីរបស់មីយ៉ាន់ម៉ា។

ជាងពីរឆ្នាំបន្ទាប់ពីយោធាមីយ៉ាន់ម៉ាឡើងកាន់អំណាច ស្ថានភាពក្នុងប្រទេសអាស៊ីអាគ្នេយ៍នេះមិនទាន់មានស្ថិរភាពនៅឡើយទេ។

មេបញ្ជាការយោធាមីយ៉ាន់ម៉ាបានសន្យាថានឹងរៀបចំផែនទីបង្ហាញផ្លូវសម្រាប់រៀបចំការបោះឆ្នោតទូទៅថ្មីដើម្បីស្ដាររដ្ឋាភិបាលជាប់ឆ្នោត ប៉ុន្តែមិនមានផែនការបោះឆ្នោតណាមួយត្រូវបានកំណត់សម្រាប់អនាគតដ៏ខ្លីខាងមុខនោះទេ។

មន្ត្រីមីយ៉ាន់ម៉ា កាលពីថ្ងៃទី១ កុម្ភៈ បានប្រកាសពន្យារពេលដាក់រដ្ឋក្នុងគ្រាអាសន្នរយៈពេល៦ខែទៀត ។ មួយថ្ងៃបន្ទាប់ពីនោះ ពួកគេបានប្រកាសច្បាប់អាជ្ញាសឹកនៅក្នុងទីក្រុងចំនួន ៣៧។ ប្រទេសមីយ៉ាន់ម៉ាកាលពីថ្ងៃទី ២២ ខែកុម្ភៈបានបន្ថែមទីក្រុងចំនួន ៣ ទៅក្នុងបញ្ជីនៃច្បាប់អាជ្ញាសឹក៕