រុស្សីបន្តវាយប្រហារអ៊ុយក្រែនជាច្រើនគោលដៅសំខាន់

រុស្សី៖ កងទ័ពរបស់រុស្សីបានវាយប្រហារគោលដៅរបស់អ៊ុយក្រែនជាច្រើនតំបន់សំខាន់ៗ ខណៈដែលអ៊ុយក្រែនបានអះអាងថា កងកម្លាំងរបស់ខ្លួនបានវាយបកកងកម្លាំងរបស់រុស្សីទៅវិញ។

អ្នកនាំពាក្យក្រសួងការពារជាតិរុស្ស៊ី លោក Igor Konashenkov បានគូសបញ្ជាក់ថា កងកម្លាំងរុស្ស៊ីបានវាយប្រហារយោធា និងអាវុធរបស់កងទ័ពអ៊ុយក្រែនជាច្រើន ក្នុងទិសដៅពីតំបន់ Kupyansk និង Krasny Liman (Lyman នៅអ៊ុយក្រែន) និងទីស្នាក់ការកណ្តាលនៃកងពលតូចលេខ ៥៩ នៅតំបន់ Donetsk ។

កងទ័ពរុស្ស៊ីក៏បានបាញ់ទម្លាក់យន្តហោះគ្មានមនុស្សបើករបស់អ៊ុយក្រែនមួយចំនួននៅក្នុងទីក្រុង Lugansk និងកន្លែងផ្សេងៗទៀត។ បន្ថែមពីលើនេះ រុស្ស៊ីបាននិយាយថា កងទ័ពរបស់ខ្លួនបានចូលកាន់កាប់ភាគខាងកើតនៃតំបន់ Bakhmut។

អគ្គសេនាធិការនៃកងកម្លាំងប្រដាប់អាវុធអ៊ុយក្រែន (AFU) បាននិយាយថា កងទ័ពអ៊ុយក្រែនបានវាយលុកការវាយប្រហាររបស់រុស្ស៊ីនៅ Bakhmut, Avdiivka និងកន្លែងផ្សេងទៀត។ កងទ័ពអ៊ុយក្រែនក៏បានវាយប្រហារ យោធារុស្ស៊ី ឃ្លាំងប្រេងឥន្ធនៈ និងគោលដៅផ្សេងទៀតផងដែរ។ អគ្គលេខាធិការអង្គការណាតូ លោក Jens Stoltenberg បានព្រមានកាលពីថ្ងៃពុធថា តំបន់ Bakhmut អាចធ្លាក់ក្នុងដៃរុស្ស៊ីនៅប៉ុន្មានថ្ងៃខាងមុខ។

មន្ត្រីលោកខាងលិចបាននិយាយថា ទាហានរុស្ស៊ីចន្លោះពី ២០,០០០ ទៅ ៣០,០០០នាក់ត្រូវបានសម្លាប់ និងរងរបួសនៅក្នុងសមរភូមិ Bakhmut ៕