ស៊ីជិនពីង ផ្តាំផ្ញើក្តីនឹករលឹកដល់លោកពូទីន

ចិន៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានជួបជាមួយអ្នកការទូតជាន់ខ្ពស់ចិន លោក វ៉ាង យី នៅទីក្រុងមូស្គូ កាលពីថ្ងៃពុធ។ ជំនួបនេះធ្វើឡើងចំពេលភាពតានតឹងនៃសង្រ្គាមរុស្សី-អ៊ុយក្រែនកំពុងតែឆ្លងដល់ឆ្នាំទី២នៃប្រតិបត្តិការពិសេសរុស្សីលើប្រទេសអ៊ុយក្រែន។

លោក វ៉ាងយី ប្រធានការិយាល័យគណៈកម្មាធិការកិច្ចការបរទេសនៃគណៈកម្មាធិការមជ្ឈិមបក្សកុម្មុយនិស្តចិន (CPC) បានពាំនាំនូវការសួរសុខទុក្ខយ៉ាងស្និទ្ធស្នាលពីប្រធានាធិបតីចិន Xi Jinping ទៅកាន់លោក Putin ដោយលោកបានអះអាងថា ជំនួបដ៏សំខាន់រវាងមេដឹកនាំទាំងពីរកាលពីឆ្នាំមុនបានកំណត់ថា ទិសដៅទំនាក់ទំនងទ្វេភាគីក្នុងឆ្នាំថ្មីរវាងចិន និងរុស្សីនៅតែស្ថិតស្ថេរជានិច្ច។

សម្រាប់លោក វ៉ាងយី ទំនាក់ទំនងចិន-រុស្ស៊ីបានឈរលើការសាកល្បងនៃស្ថានភាពអន្តរជាតិដែលផ្លាស់ប្តូរជានិច្ច ហើយនៅតែមានភាពចាស់ទុំ ធន់ និងស្ថិរភាពដូចមុន ទោះបីជាស្ថានភាពអន្តរជាតិបច្ចុប្បន្នកំពុងស្ថិតក្នុងសភាពការណ៍ដ៏ស្មុគស្មាញក៏ដោយ។

លោកវ៉ាងបានឲ្យដឹងទៀតថា ភាពជាដៃគូយុទ្ធសាស្ត្រគ្រប់ជ្រុងជ្រោយ ចិន-រុស្ស៊ី នៃការសម្របសម្រួល ទាំងគោលដៅ និងមិនចុះចាញ់នឹងការរំខាន ឬការបង្ខិតបង្ខំពីភាគីទីបីណាមួយឡើយ ដោយសារតែចិន និងរុស្ស៊ីបានកសាងទំនាក់ទំនង នៅលើមូលដ្ឋាននយោបាយ សេដ្ឋកិច្ច និងវប្បធម៌ដ៏រឹងមាំ ហើយប្រទេសទាំងពីរមានភាពស្ងប់ស្ងាត់ និងច្បាស់លាស់។ លោកវ៉ាងសង្គត់ធ្ងន់ថាប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយរុស្ស៊ី ដើម្បីរក្សាការផ្តោតជាយុទ្ធសាស្ត្រ ពង្រឹងទំនុកចិត្តគ្នាទៅវិញទៅមកផ្នែកនយោបាយ ពង្រឹងការសម្របសម្រួលជាយុទ្ធសាស្រ្ត ពង្រីកកិច្ចសហប្រតិបត្តិការជាក់ស្តែង ការពារផលប្រយោជន៍ស្របច្បាប់នៃប្រទេសទាំងពីរ និងដើរតួនាទីស្ថាបនាក្នុងការលើកកម្ពស់សន្តិភាព និងការអភិវឌ្ឍន៍ពិភពលោក។

ចំណែកលោក ពូទីន បានស្នើឱ្យលោក Wang ផ្ញើសារសួរសុខទុក្ខយ៉ាងស្មោះស្ម័គ្រទៅកាន់ប្រធានាធិបតីចិន ស៊ីជិនពីង ដោយកត់សម្គាល់ថាសមាជជាតិ CPC លើកទី ២០ បានបើកនូវទស្សនវិស័យថ្មីសម្រាប់ការអភិវឌ្ឍន៍របស់ប្រទេសចិន លោក ពូទីន បាននិយាយថា ទំនាក់ទំនងរុស្ស៊ី-ចិននាពេលនេះកំពុងឆ្ពោះទៅរកគោលដៅដែលបានកំណត់ជាមុន ជាមួយនឹងកិច្ចសហប្រតិបត្តិការទ្វេភាគីលើវិស័យផ្សេងៗ និងការសម្របសម្រួលក្នុងអង្គការពហុភាគី ដូចជាកិច្ចសហប្រតិបត្តិការសៀងហៃជាដើម។

សម្រាប់ពូទីន ប្រទេសទាំងពីរពង្រឹងសាមគ្គីភាព និងការសម្របសម្រួលក្នុងកិច្ចការអន្តរជាតិ មានសារសំខាន់ណាស់សម្រាប់ការលើកកម្ពស់ ទំនាក់ទំនងអន្តរជាតិ និងសមភាព និងស្ថិរភាពក្នុងទិដ្ឋភាពអន្តរជាតិ។

ជាមួយគ្នានេះដែរភាគីទាំងពីរក៏បានផ្លាស់ប្តូរទស្សនៈស៊ីជម្រៅអំពីវិបត្តិអ៊ុយក្រែនផងដែរ។លោក Wang បានសម្តែងការពេញចិត្តចំពោះការបញ្ជាក់ឡើងវិញរបស់រុស្ស៊ីអំពីឆន្ទៈរបស់ខ្លួនក្នុងការដោះស្រាយបញ្ហាតាមរយៈការសន្ទនា និងការចរចា។ លោកបានបន្តថា ចិននឹងរក្សាគោលជំហរដែលមាន យុត្តិធម៌ ហើយដើរតួនាទីស្ថាបនាក្នុងការដោះស្រាយវិបត្តិនយោបាយរួម៕