ចិន៖ ប្រធានាធិបតីអ៊ីរ៉ង់លោក Ebrahim Raisi នឹងធ្វើទស្សនកិច្ចជាផ្លូវការនៅប្រទេសចិននៅសប្តាហ៍ក្រោយ។ ក្រសួងការបរទេសចិនបានប្រកាសនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា ដំណើរទស្សនកិច្ចដែលបានគ្រោងទុករបស់លោក Raisi នឹងប្រព្រឹត្តទៅនៅចន្លោះថ្ងៃទី ១៤ និង ១៦ខែកុម្ភៈ តាមការអញ្ជើញរបស់មេដឹកនាំចិន ស៊ីជិនពីង ។
ដំណើរទស្សនកិច្ចរយៈពេលបីថ្ងៃនឹងរួមមានការពិភាក្សារវាងលោក Raisi និងលោក Xi កិច្ចប្រជុំរួមរបស់មេដឹកនាំជាមួយពាណិជ្ជករអ៊ីរ៉ង់ និងចិន និងការចុះហត្ថលេខាលើឯកសារសហប្រតិបត្តិការរវាងគណៈប្រតិភូនៃប្រទេសទាំងពីរ។
ចំណែកទីភ្នាក់ងារព័ត៌មានអាម៉េរិក Politico បានឲ្យដឹងថាអ៊ីរ៉ង់ "រំពឹងថានឹងធ្វើឱ្យកាន់តែស៊ីជម្រៅនូវទំនាក់ទំនងរវាងដៃគូនយោបាយ និងសេដ្ឋកិច្ចទាំងពីរ ដែលប្រឆាំងនឹងការត្រួតត្រារបស់លោកខាងលិចដែលដឹកនាំដោយសហរដ្ឋអាម៉េរិកក្នុងកិច្ចការអន្តរជាតិ" ។
លោក Xi និង Raisi បានជួបគ្នាចុងក្រោយក្នុងអំឡុងពេលកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) កាលពីខែកញ្ញាឆ្នាំមុននៅទីក្រុង Samarkand ប្រទេស Uzbekistan ។ ក្នុងអំឡុងពេលនៃកិច្ចពិភាក្សាទាំងនោះ មេដឹកនាំចិនបានទទូចថា ការពង្រឹងភាពជាដៃគូយុទ្ធសាស្ត្ររបស់ពួកគេ គឺជាជម្រើសទូទៅសម្រាប់ទាំងទីក្រុងប៉េកាំង និងទីក្រុងតេអេរ៉ង់ ស្របពេលដែលកាលពីខែធ្នូ អនុប្រធានាធិបតីចិនលោក Hu Chunhua បានទៅបំពេញទស្សនកិច្ចនៅអ៊ីរ៉ង់ និងជួបជាមួយលោក Raisi ដោយភាគីទាំងពីរបានសម្តែងការខ្នះខ្នែងក្នុងការជំរុញទំនាក់ទំនងទ្វេភាគីបន្ថែមទៀត។
គួរបញ្ជាក់ថាប្រទេសចិនគឺជាដៃគូពាណិជ្ជកម្មដ៏ធំបំផុតរបស់អ៊ីរ៉ង់ និងជាអ្នកនាំចេញប្រេងទៅកាន់ចិនច្រើនបំផុត ចំពេលមានការដាក់ទណ្ឌកម្មរបស់សហរដ្ឋអាម៉េរិកលើទីក្រុងតេអេរ៉ង់។ យោងតាមទិន្នន័យរបស់អ៊ីរ៉ង់ ការនាំចេញរបស់ខ្លួនទៅកាន់ប្រទេសចិនបានឈានដល់ ១២.៦ ពាន់លានដុល្លារក្នុងរយៈពេលដប់ខែចុងក្រោយនេះ។ ប្រទេសនេះក៏បានទិញទំនិញចិនតម្លៃ ១២,៧ ពាន់លានដុល្លារផងដែរក្នុងអំឡុងពេលនោះ។ កាលពីឆ្នាំមុន អ៊ីរ៉ង់ត្រូវបានបញ្ចូលជាផ្លូវការទៅក្នុង SCO ជាសមាជិកអចិន្ត្រៃយ៍ ហើយក៏បានដាក់ពាក្យចូលរួមជាមួយ BRICS ដែលជាអង្គការអន្តរជាតិពីរដែលចិន និងរុស្ស៊ីដើរតួយ៉ាងសំខាន់៕
