ភ្នំពេញ៖ ត្រីដែលជិតផុតពូជប្រមាណជាង ៥ពាន់ក្បាល នៅថ្ងៃទី ១៣ មករានេះ ត្រូវបានក្រសួងកសិកម្ម សហការជាមួយគម្រោងអច្ឆរិយភាពនៃទន្លេមេគង្គ ដែលផ្តល់មូលនិធិដោយ USAID បានរៀបចំពិធីលែងនៅចំណុចប្រសព្វ នៃទន្លេសាប និងទន្លេមេគង្គ។កម្មវិធីនេះ ក្នុងគោលដៅបង្ហាញពីសកម្មភាព អភិរក្សរួមគ្នាលើត្រីនៅទន្លេកម្ពុជា។
ត្រីប្រមាណជាង៥ពាន់ក្បាលនោះ មានជាអាទិ៍ ត្រីរាជដែលកំពុងរងគ្រោះជិតផុតពូជចំនួន ២ក្បាល រួមជាមួយត្រីគល់រាំង និងត្រីប្រាធំ ប្រមាណ ៥ពាន់ក្បាល។ត្រីរាជ ព្រលែងមានទម្ងន់ប្រហែល៤៥ ទៅ ៥០គីឡូក្រាម និង មានប្រវែងជាង១.៦ម៉ែត្រ។ ក្នុងចំណោមត្រីដែលត្រូវបានលែងរួមមាន ត្រីគល់រាំង ដែលជាប្រភេទ ត្រីរងគ្រោះជិតផុតពូជ ដែលត្រូវបានគេស្គាល់ថាជា "មច្ឆានិម្មិតរូបនៃកម្ពុជា" និង ត្រីប្រាធំ ជាត្រីធ្វើចរាចរផ្លាស់ទីឆ្ងាយបំផុតមួយ ហើយក៏ជាអាហារសំខាន់ក្នុងតំបន់ ប៉ុន្តែចំនួនរបស់ពួកវា មានការថយចុះយ៉ាងខ្លាំង និង បច្ចុប្បន្ននេះត្រូវគេចាត់ទុកថាជាប្រភេទត្រីរងគ្រោះជិតផុតពូជ។
គួរបញ្ជាក់ថា ត្រីរាជបានបាត់វត្តមានអស់ពីទន្លេនានា លើកលែងតែប្រទេសកម្ពុជា។ សព្វថ្ងៃនេះ ប្រទេសក្នុងតំបន់អាស៊ីអាគ្នេយ៍ត្រូវបានគេទទួលស្គាល់ យ៉ាងទូលំទូលាយថាកំពុងរក្សាក្តីសង្ឃឹម ដ៏មុតមាំបំផុត សម្រាប់ការបន្តវត្តមាន និងការកើតឡើងវិញ នៃប្រភេទសត្វនានា និងត្រីយក្សទន្លេមេគង្គដទៃ ទៀតដូចជា ត្រីគល់រាំង ត្រីបបែលយក្ស ត្រីសណ្ដាយ និងត្រីត្រសក់ ។
ក្រុមអ្នកជំនាញបានចាត់ទុក សកម្មភាពនេះនឹងនាំឱ្យមានសកម្មភាព អភិរក្សរួមគ្នា និង សម្របសម្រួលបន្ថែមទៀត រួមទាំងការផ្សព្វផ្សាយកាន់តែផុសផុល ដល់សហគមន៍ដែលរស់នៅតាមដងទន្លេសាប និងទន្លេមេគង្គ ខណៈស្ថានភាពគួរឱ្យបារម្ភនៃប្រភេទសត្វជិតផុតពូជត្រីទាំងនេះ បានថយចុះរហូតដល់ ៩៩ភាគរយ ក្នុងរយៈពេលប៉ុន្មានទសវត្សរ៍ចុងក្រោយ។
